එළඹෙන ඇමරිකානු ජනාධිපතිවරණයේ රිපබ්ලිකන් පක්ෂ අපේක්ෂයා ලෙස හිටපු ජනාධිපති ඩොනල්ඩ් ට්‍රම්ප් නම් කිරීමට එම පක්ෂය කටයුතු කළා.
එමෙන්ම ට්‍රම්ප්ගේ දෙවැනියා ලෙස රිපබ්ලිකන් පක්ෂ විසින් තෝරාගනු ලැබුවේ ඔහියෝ හි සෙනෙට් සභික ජේ.ඩී.වැන්ස් බවයි විදෙස් වාර්තා සඳහන් කරන්නේ.
වැන්ස් වරක් ට්‍රම්ප් විවේචකයෙකුව සිටි අතර, මේ වනවිට ඔහු ට්‍රම්ප්ගේ වඩාත්ම විශ්වාසදායක ආරක්ෂකයෙකු බවට පත්ව සිටිනවා.
එළඹෙන නොවැම්බරයේ පැවැත්වෙන ජනාධිපතිවරණයෙන් වත්මන් ජනාධිපති ජෝ බයිඩන් පරදවා ට්‍රම්ප් ජනාධිති ධුරයට පත්වුවහොත් උප ජනාධිපතිවරයා ලෙස ජේ.ඩී. වැන්ස් පත්වනු ඇති.
විස්කොන්සින් ජනපදයේ, මිල්වෝකී නුවර දී රිපබ්ලිකන් පක්ෂයේ පක්ෂ සම්මේලනය පැවති අතර, එහිදී මෙම තෝරා ගැනීම් සිදුකරනු ලැබුවා.
මේ අතර ට්‍රම්ප් සිය දෙවැනියා ලෙස වැන්ස්ව තෝරාගැනීම සම්බන්ධයෙන් ඩිමොක්‍රටික් පක්ෂයෙන් ජනාධිපති ධුරය සඳහා තරඟවදින වත්මන් ජනාධිපති ජෝ බයිඩන්ගේ පාර්ශ්වය කනස්සල්ල සහ අප්‍රසාදය පළකර ඇති බව සඳහන්.
මේ අතර පසුගිය සෙනසුරාදා ට්‍රම්ප්ව ඉලක්ක කරගනිමින් පෙන්සිල්වේනියාවේ ට්‍රම්ප්ගේ රැළියේ දී සිදු වූ වෙඩි තැබීමෙන් ඇතැම් රිපබ්ලිකන් පාක්ෂිකයින් තවමත් කම්පාවට පත්ව සිටිනවා.
