කැකිරාව අධ්‍යාපන කලාපයට අයත් ගනේවල්පොල මුස්ලිම් මහ විද්‍යාලය ඉදිරිපිට දී අද දෙමව්පියෝ පිරිසක් උද්ඝෝෂණයක නිරත වුණා.
ඒ එම විද්‍යාලයේ විදුහල්පතිවරයාගේ අත්තනෝමතික ක්‍රියා කලාප හා පරිපාලනමය දුර්වලතා සම්බන්ධයෙන් විරෝධය පළ කරමිනුයි.
එම විදුහල්පතිරවයා ව පාසලෙන් ඉවත් කරන ලෙස අධ්‍යාපන බලධාරීන්ට බල කරමින් ඔවුන් එම විරෝධතාවයේ නිරත වූ බවයි අප ප්‍රාදේශීය වාර්තාකරු පැවසුවේ.
අදාළ විදුහල්පතිවරයා ඉකුත් දිනෙක රාත්‍රී කාලයේ කිසියම් පිරිසක් සමග එක්ව පාසැල් සංවර්ධන සමිතිය හෝ ආදිශිෂ්‍ය සංගමය ද දැනුම්වත් නොකොට විද්‍යාලය තුළ දී කිසියම් පිරිසක් සමග රහස් රැස්වීමක් ද පැවැත්වූ බව ද විරෝධතාකරුවෝ පවසනවා.
ගම්වාසීන්ගේ දැඩි විරෝධය මැද මරදන්කඩවල පොලිස් ස්ථානයේ නිලධාරීන්ගේ ආරක්ෂාව මැද රාත්‍රී කාලයේ එම විදුහල්පතිවරයා පාසලෙන් පිටව යන අයුරු ඇතුළත් දර්ශන ද මාධ්‍ය වෙත ලබාදීමටයි විරෝධතාකරුවන් කටයුතු කළේ.
විරෝධතා පුවරු පුදර්ශනය කරමින් විරෝධතා පාඨ කියමින් ඔවුන් අද මෙලෙස විදුහලේ ප්‍රධාන ගේට්ටුව ඉදිරි පිට දී විරෝධතාවයේ නිරත වූ අතර, විරෝධතාව පැවති ස්ථානයේ පිහිටි පාසලේ හා විරෝධතාකරුවන්ගේ ආරක්ෂාව සඳහා මරදන්කඩවල පොලිස් ස්ථානය මගින් පොලිස් ආරක්ෂාව ද ලබා දුන්නා.
කැකිරාව කලාප අධ්‍යාපන අධ්‍යක්ෂවරයා විරෝධතාකරුවන්ට පොරොන්දු වූයේ පළාත් අධ්‍යාපන අධ්‍යක්ෂට දැනුම්දී විදුහල්පතිවරයාගේ ක්‍රියා කලාප සම්බන්ධයෙන් පියවර ගන්නා බවයි.
ඉන් පසුවයි පැය දෙකකට අධික කාලයක් පැවති විරෝධතාව අවසන් කෙරුණේ.
