රැකියා ස්ථාන තුළ කාන්තාව මුහුණදෙන ගැටලු පිළිබඳ ව විදේශ රැකියා හා ශ්‍රමය පිළිබඳ ආංශික අධීක්ෂණ කාරක සභාවේ අවධානය යොමු ව තිබෙනවා.
පාර්ලිමේන්තු සන්නිවේදන අංශය නිවේදනයක් නිකුත් කරමින් සඳහන් කරන්නේ; මෙම කරුණ සම්බන්ධයෙන් වැඩි අවධානයක් පසුගියදා පාර්ලිමේන්තු මන්ත්‍රී හෙක්ටර් අප්පුහාමිසභාපතිත්වයෙන් පාර්ලිමේන්තුව දී රැස්වූ අවස්ථාවේ දී සාකච්ඡාවට ගැනුණු බවයි.
මේ පිළිබඳ සාකච්ඡා කිරීම සඳහා රාජ්‍ය නොවන ආයතන සහ වෘත්තීය සමිති කිහිපයක නියෝජිතයින් කැඳවා තිබුණු අතර මෙහිදී පැමිණි නියෝජිතයින් පෙන්වා දුන්නේ මෙරට ජනගහනයෙන් වැඩි කොටසක් කාන්තාවන් වුව ද විධායක ශ්‍රේණියේ තනතුරු සඳහා පත්වන කාන්තාවන් සංඛ්‍යාව සීමිත බවයි.
ඇඟලුම් ක්ෂේත්‍රයේ නියුතු කාන්තාවන්ගේ දරුවන් රැක බලාගැනීම සඳහා විධිමත් ආකාරයෙන් දිවා සුරැකුම් මධ්‍යස්ථාන ඇතිකිරීමේ අවශ්‍යතාව ද මෙහිදී පැමිණි නියෝජිතයින් පෙන්වා දුන්නා.
ගෘහ සේවයේ නියුතු වෘත්තිකයන් පිළිබඳ පවතින නීතිමය ගැටලු සම්බන්ධයෙන් ද මෙහිදී පැමිණි පාර්ශ්ව පෙන්වා දුන් අතර මේ සම්බන්ධයෙන් කාරක සභාවේ අවධානය යොමුකොට
අවශ්‍ය පියවර ගැනීම වෙනුවෙන් මැදිහත් වන බවයි කාරක සභාව දැනුම්දුන්නේ.
කාන්තා ළමා කටයුතු හා සමාජ සවිබල ගැන්වීමේ අමාත්‍යාංශය පෙන්වා දුන්නේ කාන්තාව ව්‍යවසායකයන් ලෙස සවිබලගැන්වීම සම්බන්ධයෙන් තම අමාත්‍යාංශය විශේෂ අවධානයක් යොමු කරන බවයි.
මීට අමතරව කෘත්‍රීම බුද්ධිය රැකියා ක්ෂේත්‍රයට සම්බන්ධ වීම මගින් කාන්තා වෘත්තිකයින්ට
සිදුවන බලපෑම පිළිබඳව ද මෙහිදී අවධානයට ලක් වුණා.
මෙම සාකච්ඡා කළ සියලු කරුණු සම්බන්ධයෙන් කාරක සභාවට වාර්තාවක් ලබාදෙන ලෙස පාර්ලිමේන්තු මන්ත්‍රී හෙක්ටර් අප්පුහාමි පැමිණි නියෝජිතයින්ගෙන් ඉල්ලීමක් ද සිදු කළා.
