ජනාධිපති ගෝඨාභය රාජපක්ෂ මහතා රැකියා ලක්ෂයේ වැඩසටහන යටතේ බඳවා ගනු ලැබූ පිරිස් සෞඛ්ය සේවා දෙපාර්තමේන්තුවට අන්තර්ග්රහණය කරන්නේ නොමැති බව පවසනවා. මේ රැකියා ලාභීන් ස්ථිර සේවකයන් ලෙස සෞඛ්ය සේවයට ඇතුළත් කර ගන්නා බවට පතුරුවා හැර ඇති මතය මුළුමනින් වැරදි බවයි ඒ මහතා පවසන්නේ.
මේ බව ප්රකාශ කළේ ඊයේ සවස ජනාධිපති කාර්යාලයීය සභා ශාලාවේ පැවති ශ්රී ලංකා පොදුජන පෙරමුණට අනුබද්ධ වෘත්තීය සමිති සම්මේලනයේ නියෝජිත හමුවේදී මෙබඳු මතයක් සෞඛ්ය සේවකයන් අතර ප්රචලිත කර ඇති බවට සමිති නියෝජිතයන් කළ සඳහනට ප්රතිචාර වශයෙන්. රැකියා ලක්ෂයේ වැඩසටහන පහළම ආදායම් ස්ථරයට අයත් පවුල්වලින් තෝරා ගන්නා පිරිස් රැකියා නියුක්ත කොට ඔවුන් දිළිඳුකමින් මුදා ගැනීම අරමුණු කොටගත් එකක්.
තෝරාගත් පිරිස්වලට රෝහල්, පාසල් සහ විවිධ රාජ්ය ආයතනවල ශ්රමිකයන්, පවිත්රතා කම්කරුවන් සහ යන්ත්රෝපකරණ හසුරුවන්නන් ආදී වශයෙන් පුහුණුවක් දෙනු ලබනවා. ඊට බඳවා ගනු ලබන්නේ විධිමත් අධ්යාපන හෝ වෘත්තීය සුදුසුකම් හෝ නිපුණතා හෝ නැති අය පමණයි. පුහුණුවෙන් පසු ඔවුනට ඒ ඒ ආයතනවල ස්ථීර පත්වීම් ප්රදානය කෙරෙන අතර එසේ වුවද ඔවුන් සෞඛ්ය සේවයට අන්තර්ග්රහණය කිරීමක් සිදු නොවන බව ජනාධිපතිතුමා පැහැදිලි කළා.
