එළැඹෙන ජනාධිපතිවරණයේදී ශ්‍රී ලංකා ජනතා ජාතික පක්ෂයේ සහාය සර්වජන අපේක්ෂක ව්‍යවසායක, දිලිත් ජයවීර මහතාට ලබාදීමට එම පක්ෂය තීරණය කර තිබෙනවා.
ශ්‍රී ලංකා ජනතා ජාතික පක්ෂය සහ සර්වජන බලය එකමුතුව අවබෝධතා ගිවිසුමට අත්සන් කිරීම මීට සුළු වේලාවකට (19) පෙර බොරැල්ලේ පිහිටි මව්බිම ජනතා පක්ෂ කාර්යාලයේ දී සිදු කෙරුණු බවයි වාර්තා වන්නේ.
මේ අතර ජනාධිපතිවරණයේ දී කුමන අපේක්ෂකයාට සහාය දක්වන්නේ ද යන්න ඔවුන්ගේ ප්‍රතිපත්ති ප්‍රකාශ එළිදැක්වීමෙන් අනතුරුව තීරණය කරන බව ඉලංකෙයි තමිල් අරසු පක්ෂය (ITAK)පවසනවා.
එම පක්ෂයේ මධ්‍යම කාරක සභාව ඊයේ (18) වව්නියාව ප්‍රදේශයේ දී පැවති අතර ඊට පක්ෂයේ සියලු සාමාජිකයින් එක්ව සිටියා.
එහිදි ජනාධිපතිවරණයේදී සිය පක්ෂය සහාය දැක්විය යුතු අපේක්ෂකයා සම්බන්ධයෙන් විවිධ මත පළ වීමත් සමග රැස්වීමේ උණුසුම්කාරී තත්ත්වයක් ද හටගත් බවයි වාර්තා වන්නේ.
කෙසේවෙතත් පක්ෂයේ මතය කුමක් ද යන්න සම්බන්ධයෙන් ප්‍රධාන ජනාධිපති අපේක්ෂකයින්ගේ ප්‍රතිපත්ති ප්‍රකාශ එළිදැක්වීමෙන් අනතුරුව ප්‍රකාශ කරන බව ඉලංකෙයි තමිල් අරසු පක්ෂයේ පාර්ලිමේන්තු මන්ත්‍රී ශානක්කියන් රාසමානික්කම් මහතා කියා සිටියේ.
