තඹුත්තේගම පොලිස් වසමේ රාජාංගනය, නවසිරිගම ප්‍රදේශයේ දී තියුණු ආයුධයකින් ඇණ කාන්තාවක් ඝාතනය කිරීමේ සිද්ධියට සම්බන්ධ පුද්ගලයා අත්අඩංගුවට ගත් බව පොලිසිය පවසනවා.
රාජාංගනය – 05 කණුව ප්‍රදේශයේ ඔහු රැදී සිටින බවට පොලීසියට ලැබුණු දුරකථන ඇමතුමකට අනුව අද (08) පෙරවරුවේ සැකකරු අත්අඩංගුවට ගැනීමට හැකි වූ බවයි පොලිසිය සඳහන් කළේ.
ඝාතනය සඳහා සැකකර යොදා ගත් උල් ආයුධය ද පොලීසිය විසින් සිදුකළ ප්‍රශ්න කිරීම් මත සඟවා තිබිය දී සොයාගෙන තිබෙනවා.
අපරාධය සම්බන්ධයෙන් අත්අඩංගුවට ගැනුණු සැකකරු රාජාංගනය, නවසිරිගම ප්‍රදේශයේ ම පදිංචි 65 හැවිරිදි පුද්ගලයෙක්.
සැකකරු විසින් ඊයේ (07) පස්වරුවේ 53 හැවිරිදි තිදරු මවක් ඝාතනය කර තිබූ බවයි තොරතුරු වාර්තා වුණේ.
මීට දින කීපයකට පෙර ඇය වෙන්නප්පුව ප්‍රදේශයේ සිය දියණියගේ නිවසට ගොස් ඊයේ (07) පැමිණ සිටිය දී මෙලෙස ඝාතනයට ලක්ව තිබෙනවා.
ඝාතනයට ලක් වූ කාන්තාවගේ සැමියා මීට වසර 15 කට පමණ ඉහත දී රෝගාතුරුව මිය යාමෙන් පසු ඝාතනයට සිදුකළ පුද්ගලයා සමඟ වසර 13ක පමණ සිට අදාළ කාන්තාව අනියම් ඇසුරක් පවතවාගෙන ගොස් ඇති බවයි අනාවරණය වී ඇත්තේ.
ඝාතනය සිදු කළ බව කියන සැකකරු විවාහකයකු බවත්, ඔහුට ද දරුවන සිටින බවයි පවුලේ ඥාතීන් පවසා ඇත්තේ.
මෙම යුවළ නීත්‍යාණූකූලව විවාහ නොවූව ද වසර ගණනක් එකට දිවි ගෙවා ඇති බවත් බවත්, කාන්තාවගේ බාල දරුවා සමඟ එක නිවසක ඔවුන් දිවි ගෙවූ බවටයි මේ වනවිට අනාවරණය වී ඇත්තේ.
මේ අතර බාල දරුවා සමඟ මීට මාසයකට පෙර ඇති වූ ආරවුලක් සම්බන්ධයෙන් පොලීසියට පැමිණිලි කර ඇති අතර, එම ගැටුම සමථ මණ්ඩලයට යොමු කර තිබෙනවා.
ඒ අනුව ඊයේ (07) දින සමථ මණ්ඩලයේ දී එය විභාගයට ගැනීමට නියමිතව තිබූව ද ඒ සඳහා කාන්තාවගේ සොහොයුරා හා දරුවා සහභාගී වී නොමැති බවයි වාර්තා වුණේ.
ඝාතනය සිදුකළ පුද්ගලයා සමථ මණ්ඩලයට සහභාගී වීමෙන් පසු එළැඹෙන 21 වැනි දින පැමිණෙන ලෙස දැන්වූ බව ද ඔහු විසින් ඝාතනයට ලක් වූ කාන්තාවට නිවස අසලදී පවසා තිබෙනවා.
පසුව ඊයේ (07) දිනයේ ම පස්වරුවේ නිවස අසළ වෙළඳසැලකදී ද ඝාතනය සිදුකළ සැකකරු විසින් ඝාතනයට ලක් වූ කාන්තාවගෙන් “සමථ මණ්ඩලයට යනවාද?” යැයි විමසා ඇති බවයි වාර්තා වන්නේ.
එහිදී එම කාන්තාව “ 21 නේ තියෙන්නේ “ යනුවෙන් පවසා ධීවර රැකියාවේ නිරත වීම සඳහා වැවට ගොස් නැවත ඇයගේ සොයුරාගේ නිවසට පස්වරුවේ පැමිණ දිවා අහාරය ලබාගෙන තිබෙනවා.
එම අවස්ථාවේ සැකකරු විසින් එම නිවසට පැමිණ “ආ.. උඹ හොඳට ඉන්නවා නේද” යැයි පවසා “ඉඳපන්කෝ උඹට හොඳ වැඩක් කරන්න” යනුවෙන් සඳහන්කර ඉනේ සඟවාගෙන සිටි කිනිස්සකින් කාන්තාවගේ ශරීරයේ ස්ථාන කිහිපයකට ඇන තිබෙනවා.
එහිදී බරපතල තුවාල ලැබූ කාන්තාව රාජාංගනය, යාය 05 ප්‍රාදේශීය රෝහලට ඇතුළත් කර ඇති අතර, ඒ වන විටත් ඇය ජීවිතක්ෂයට පත්ව සිටි බවයි වාර්තා වුණේ.
අත්අඩංගුවට ගත් සැකකරු තඹුත්තේගම මහේස්ත්‍රාත් අධිකරණයට ඉදිරිපත් කිරීමට නියමිතව බව අප වාර්තාකරු සඳහන් කළා.
