අභාවප්‍රාප්ත රාජ්‍ය අමාත්‍ය සනත් නිශාන්ත මහතාගේ දේහය පුත්තලමේ පිහිටි ඒ මහතාගේ නිවස වෙත රැගෙන යෑම අද ආරම්භ වී තිබෙනවා.
මහජන ගෞරවය සඳහා දේහය ඊයේ පස්වරුවේ සිට තැන්පත් කර තැබුණේ කොළඹ පෞද්ගලික මල් ශාලාවකයි.
අවසන් කටයුතු ලබන ඉරිදා ආරච්චිකට්ටුවේදී සිදු කිරීමට නියමිතව තිබෙනවා.
කටුනායක අධිවේගී මාර්ගයේදී රාජ්‍ය අමාත්‍ය සනත් නිශාන්ත මහතා ගමන් ගත් ජීප් රථය එම දෙසටම ධාවනය වූ කන්ටේනර් රථයක පිටුපස ගැටී ඊයේ අලුයම සිදු වූ අනතුරකින් රාජ්‍ය අමාත්‍යවරයා සහ ඔහුගේ ආරක්ෂක නිලධාරියා ජීවිතක්ෂයට පත්වුණා.
රාගම ශික්ෂණ රෝහලේදී පැවැත්වුණු පශ්චාත් මරණ පරීක්ෂණයෙන් අනතුරුව දේහය ඥාතීන් වෙත භාර දුන්නා.
අභාවප්‍රාප්ත වූ රාජ්‍ය අමාත්‍ය සනත් නිශාන්ත මහතාගේ දේහය ඊයේ පස්වරුවේ මහජන ගෞරවය සඳහා කොළඹ පෞද්ගලික මල් ශාලාවක තැන්පත් කෙරුණා.
ජනාධිපති රනිල් වික්‍රමසිංහ මහතා මෙන්ම හිටපු ජනාධිපති මහින්ද රාජපක්ෂ මහතා එහිදී දේහයට අවසන් ගෞරව දැක්වූවා.
ඊයේ රාත්‍රිය පුරා සනත් නිශාන්ත මහතාගේ දේහයට අවසන් ගෞරව දැක්වීම සඳහා දේශපාලනඥයින්, පාක්ෂිකයන් ඇතුලු බොහෝ පිරිසක් එහි පැමිණියා.
බොරැල්ලේ පෞද්ගලික මල් ශාලාවේ තැන්පත් කර තිබූ රාජ්‍ය අමාත්‍යවරයාගේ දේහය ආරච්චිකට්ටුව ප්‍රදේශයේ පිහිටි ඔහුගේ නිවස වෙත අද රැගෙන යෑම ආරම්භ කළා.
මහජන ගෞරවය සඳහා අද පස්වරුවේ සිට දේහය එහි තැන්පත් කර තැබෙනවා. අභාවප්‍රාප්ත සනත් නිශාන්ත මහතාගේ දේහය පිළිබඳ අවසන් කටයුතු ලබන ඉරිදා ආරච්චිකට්ටුවේදී සිදුකිරීමට නියමිතයි.
