ශ්‍රී පාද වන්දනාකරුවන් පිරිසක් රැගත් බස් රථයක් ඊයේ (23) රාත්‍රියේ නානුඔය – රදැල්ල කෙටි මාර්ගයේ දී පෙරළී යාමෙන් අනතුරක් සිදුව තිබුණා.
පොලිසිය පවසන්නේ රදැල්ල කෙටි මාර්ගයේ මගී ප්‍රවාහන බස් රථ ධාවනය තහනම්කර තිබියදීත් අදාළ බස් රථයේ එම මාර්ගයේ ධාවනය කිරීමෙන් මෙම අනතුර සිදුව ඇති බවයි.
කෙසේ වෙතත් එම මාර්ගයේ මගී ප්‍රවාහන බස් රථ ධාවනය තහනම් කර ඇති බව තමන් නොදැන සිටි බව අනතුරට පත් බස් රථයේ රියදුරු පවසා ඇති බවයි නානුඔය පොලිසිය සඳහන් කළේ.
මාතර සිට නුවරඑළිය හරහා ශ්‍රි පාද වන්දනාවේ පැමිණි පිරිසක් රැගත් මෙම බස් රථයට නානුඔය – රදැල්ල කෙටි මාර්ගයේ මාර්ගය හරහා පෙරළීයාමෙන් බස් රථයේ ගමන් ගත් අටදෙනෙක් තුවාල ලබා රෝහල් ගත කෙරුණා.
අධික බැවුමක් සහිත එම මාර්ගයේ ධාවනය වූ බස් රථයේ තිරිංග පද්ධතිය හදිසියේ ක්‍රියා විරහිත වීම හේතුවෙන් මෙම අනතුර සිදුව ඇති බවයි පොලිසිය සඳහන් කළේ.
බස් රථයේ ගමන් ගත් පිරිස මාතර සහ අකුරැස්ස යන ප්‍රදේශවල පදිංචිකරුවන් වන අතර, බස් රථයේ රියදුරාට එරෙහිව අධිකරණය හමුවේ දැඩි නීතිමය ක්‍රියාමාර්ගගන්නා බවයි නානුඔය පොලිසිය වැඩිදුරටත් පැවසුවේ.
