ජාත්‍යන්තර පොලිසියේ රතු වරෙන්තුකරුවන් ලෙස නම්කර සිටි; මෙරටින් පලා ගිය අඹු – සැමි යුවළක් සහ ඔවුන්ගේ බාලවයස්කාර දරුවා අත්අඩංගුවට ගෙන තිබෙනවා.
ඊයේ (26) රාත්‍රියේ දී මෙම සැකකරුවන් යුවළ සිය දරුවා ද රැගෙන නැවති කටුනායක ගුවන්තොටුපොළ වෙත පැමිණෙමින් සිටියදියි අත් අඩංගුවට ගැනුණේ.
මෙරට තුළ රුපියල් කෝටි ගණනක මූල්‍ය වංචා සිදු කර ඇති බවට සැකකරුවන්ට චෝදනා එල්ල වී තිබෙනවා.
කොළඹ – 05 ප්‍රදේශයේ පදිංචි 49 හැවිරිදි අහමඩ් සරීම් මොහොමඩ් සියාබ්, ඔහුගේ බිරිඳ 43 හැවිරිදි ෆාතිමා පර්සානා මර්කාබ් සහ ඔවුන්ගේ 14 හැවිරිදි දරුවා ඉකුත් 2021 වසරේ දී බෝට්ටු මගින් ඉන්දියාව වෙත පලා ගොස් තිබුණා.
ඔවුන් ඒ වනවිට ශ්‍රී ලංකාව පුරා මූල්‍ය වංචා විශාල වශයෙන් සිදු කර තිබූ අතර, ඔවුන්ට එරෙහිව කොළඹ , ත්‍රිකුණාමලය සහ මඩකලපුව යන ප්‍රදේශවල අධිකරණ මගින් ගුවන් ගමන් තහනම් 08ක් ද පනවා තිබියදියි රටින් හොර රහසේ ම පලා ගොස් ඇත්තේ.
සැකකරු සහ ඔවුන්ගේ බාල වයස්කාර දරුවා ඊයේ දහවල් ඉන්දියාවේ සිට ඉන්දීය ගුවන් සේවයේ ගුවන් යානයකින් කටුනායක ගුවන් තොටුපොළ වෙත පැමිණෙමින් සිටියදී, ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන් විසින් අත්අඩංගුවට ගනු ලැබූ අතර ඉන්පසුව ඔහුගේ බිරිඳ ද එදින රාත්‍රීයේ ඉන්දියාවේ සිට තවත් ගුවන් යානකින් කටුනායක ගුවන් තොටුපොළ වෙත පැමිණීමේ දී අත්අඩංගුවට ගැනුණා.
ඔවුන් පිළිබඳ මූලික විමර්ශන කටයුතු සිදු කළ කටුනායක ගුවන් තොටුපොළ අපරාධ පරීක්ෂණ දෙපාර්තමේන්තු නිලධාරීන්, වැඩිදුර විමර්ශන කටයුතු සඳහා කොළඹ අපරාධ පරීක්ෂණ දෙපාර්තමේන්තු මූලස්ථානයේ මූල්‍ය සහ වාණිජ අපරාධ විමර්ශන අංශයේ නිලධාරීන් වෙත අද (27) අලුයම භාර කෙරුණා.
