අද (06) පැවැත්වෙන ටෙස්ට් තරගයෙන් අනතුරුව ජාත්‍යන්තර ක්‍රිකට් පිටියෙන් සමු ගන්නා ආරම්භක පිතිකරුවෙකු මෙන් ම ශ්‍රී ලංකා ක්‍රිකට් කණ්ඩායමේ හිටපු නායකයෙකු වන දිමුත් කරුණාරත්න හට විශේෂ සමුදීමේ කෙටි උත්සවයක් පැවැත්වුණා.
ඒ ගාල්ල ජාත්‍යන්තර ක්‍රීඩාංගණයේදියි.
මෙම අවස්ථාවේ දී ශ්‍රී ලංකාව වෙනුවෙන් ටෙස්ට් තරග 100ක් ක්‍රීඩා කළ සත්වැනි ක්‍රීඩකයා ලෙසයි දිමුත් කරුණාරත්න ඉතිහාසගත වන්නේ.
මීට පෙර සනත් ජයසූරිය, කුමාර් සංගක්කාර, මහේල ජයවර්ධන, මුත්තයියා මුරලිදරන් සහ චමින්ද වාස් ටෙස්ට් තරග 100ක් ශ්‍රී ලංකාව වෙනුවෙන් ක්‍රීඩා කර තිබෙනවා.
අද දිනයේ දී තම 100 වැනි ටෙස්ට් තරගයට ක්‍රීඩා කරන දිමුත් හට එම හිස් වැසුම පැළඳවීමට ද ප්‍රධාන පුහුණුකරු ලෙස කටයුතු කරන සනත් ජයසූරිය හට අවස්ථාව උදා වුණා.
මීට අමතරව ඔහු වෙනුවෙන් සමරු ඵලක ද්විත්වයක් ද ශ්‍රී ලංකා ක්‍රිකට් ආයතනයෙන් පිරිනැමුණු අතර මෙම අවස්ථාව සඳහා දිමුත් කරුණාරත්නගේ පවුලේ පිරිසක් එක් ව සිටියා.
දිමුත් කරුණාරත්නය මේ වනවිට ටෙස්ට් තරග 100කට ක්‍රීඩා කරමින් ලකුණු 7172ක් හිමිකරගෙන තිබෙනවා.
ඊට ශතක 16ක් සහ අර්ධ ශතක 39ක් ඇතුළත්.
2012 නවසීලන්තයට එරෙහිව ගාල්ලේ පැවති ටෙස්ට් තරගයකදියි දිමුත් කරුණාරත්න ටෙස්ට් වරම් හිමිකරගත්තේ.
දිමුත් ශ්‍රී ලංකා කණ්ඩායම වෙනුවෙන් ටෙස්ට් තරග 30ක් සඳහා සිය නායකත්වය ලබා දී ඇති අතර එහිදී තරග 12ක් ජයග්‍රහණයකින් ද තරග 06ක් ජය පරාජයෙන් තොරව ද අවසන් කරගැනීමට සමත් වුණා.
