කටුනායක ගුවන් තොටුපොළ ආගමන විගමන දෙපාර්තමේන්තුවට අයත් පරිගණක පද්ධතිය අද දහවල් 11.30 පමණ සිට අක්‍රීය වී තිබෙනවා.
අප වාර්තාකරු සඳහන් කළේ මේ හේතුවෙන් විදෙස් ගත වීමට පැමිණි විශාල පිරිසක් කටුනායක ගුවන් තොටුපොළ තුළ නොසන්සුන්තාවට පත්ව සිටින බවයි.
ආගමන විගමන දෙපාර්තමේන්තුවේ මෙම පරිගණක පද්ධතිය පෞද්ගලික අංශයේ සමාගම් කීපයක් විසින් සකස් කර පවත්වා ගෙන යනු ලබන අතර නිසි නඩත්තු කිරීමක් නොමැති නිසා මාසයකට කිහිප වරක් මෙලෙස අක්‍රීය වන බවයි එහි ප්‍රකාශකයෙකු සඳහන් කළේ.
එසේම ජාත්‍යන්තර පොලිසිය සමග මෙම පරිගණක පද්ධතිය ඒකාබද්ධ කර පවතින අතර එහි මන්දගාමී වීම ද කටුනායක ගුවන් තොටුපොළ ආගමන විගමන දෙපාර්තමේන්තු පරිගණක පද්ධතිය අඩපණ වීමට හේතු වන බව සඳහන්.
අද දහවල් 12.20 පමණ වන විට ක්‍රමයෙන් මෙම පරිගණක පද්ධතිය යළිත් සක්‍රීය වෙමින් පවතින අතර ගුවන් තොටුපොළ තුළ පවතින අධික මගී තදබදය මදක් ලිහිල් වෙමින් පවතින බව අප වාර්තාකරු ප්‍රකාශ කළා.
අද දහවල් කටුනායක ගුවන් තොටුපොළෙන් ලෝකයේ විවිධ රටවල ගමනාන්ත කරා පිටත්ව වීමට සහ එවැනි ගමනාන්තවල සිට ගුවන් තොටුපොළ වෙත පැමිණෙමින් තිබෙන ගුවන් යානා රාශියක් මේ නිසා බලපෑමට ලක් විය හැකි බව ද සඳහන්.
