හුස්ම ගැනීමේ සංකූලතා සහ කොවිඩ් -19 රෝග ලක්ෂණ ඇති බවට සැකකෙරෙන අවුරුදු 55 ට වැඩි අය වහාම වෛද්යවරයෙකු හමුවීමට හෝ ළඟම ඇති රෝහලකට යන ලෙස යුද හමුදාපති ජෙනරාල් ශවේන්ද්ර සිල්වා මහතා ඉල්ලා සිටී.
මේ අතර ජාතික බෝ වන රෝග විද්යායතනයේ අධ්යක්ෂ, කායික රෝග විශේෂඥ වෛද්ය ආනන්ද විජේවික්රම මහතා පෙන්වා දෙන්නේ කොවිඩ් නියුමෝනියා තත්වයට පත්වූ රෝගීන් 1000 කට වැඩි ප්රමාණයක් මේ වන විට දිවයින පුරා රෝහල්වල ප්රතිකාර ලබමින් සිටින බවයි.
ශ්රී ලංකාව අද වන විට ඉතා අවදානම් සහගත තීරණාත්මක අවස්ථාවක පසුවන බවත් මේ අවස්ථාවේදී කොවිඩ් මර්දනයට ගත් හැකි සියලු ක්රියාමාර්ග නොගත්තොත් ඉදිරි සති තුනක හතරක කාලය තුළ ඉතා දරුණු ව්යසනකාරී තත්වයක් මතු විය හැකි බවත් වෛද්යවරයා සඳහන් කළේය.
කොවිඩ් නියුමෝනියාව ඇතිවන අයගෙන් මියයන්නේ ඉතා අඩු සංඛ්යාවක් බවත් රෝහල්ගත වන විට නිව්මෝනියාව උත්සන්න වී තිබීම, වයස අවුරුදු 60ට වැඩිවීම හා වෙනත් රෝගාබාධ තිබීම වැනි අවස්ථාවලදී රෝගියා මියයාමට අවස්ථාවක් තිබෙන බව ද ඔහු පැවසීය.
රජයේ ප්රවෘත්ති දෙපාර්තමේන්තුවේදී පැවති මාධ්ය හමුවක් අමතමින් වෛද්යවරයා වැඩිදුරටත් සඳහන් කළේ මේ වයිරසය පහසුවෙන් මැරෙන වයිරසයක් බවත් නිතර දෑත් පිරිසිඳු කිරීම, නිසි ලෙස මුහුණු ආවරණ පැළඳීම, දුරස්ථභාවය පවත්වාගැනීම, ජනතාව ගැවසෙන තැන් මගහැරීම මගින් ඉන් ආරක්ෂා විය හැකි බවයි.
