රජයේ මිනින්දෝරු සංගමය විසින් දියත් කර ඇති වෘත්තීය ක්රියාමාර්ග හේතුවෙන් මේ වනවිට (05) අත්හිටුවා තිබෙන රජයේ මිනින්දෝරුවන්ගේ වැටුප් කොන්දේසිවලට යටත්ව ගෙවීම් සිදු කිරීමට සූදානම් බව නීතිපතිවරයා විසින් ශ්රේෂ්ඨාධිකරණයට දැනුම්දෙනු ලැබුවා.
වෘත්තීය සමිති ක්රියාමාර්ගයක් හේතුවෙන් සිය වැටුප් අත්හිටුවීමට ගෙන තිබෙන තීරණය බලරහිත කරන ලෙස ඉල්ලා රජයේ මිනින්දෝරු සංගමය විසින් ගොනුකළ මූලික අයිතිවාසිකම් පෙත්සමක් කැඳවූ අවස්ථාවේ දී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජනරාල් කනිෂ්කා ද සිල්වා මහත්මිය මේ බව දැනුම් දුන් බවයි අප අධිකරණ වාර්තාකාරිණිය පැවසුවේ.
මෙම පෙත්සම ශ්රේෂ්ඨාධිකරණ විනිසුවරුන් වන ප්රීති පද්මන් සුරසේන, යසන්ත කෝදාගොඩ සහ ප්රියන්ත ප්රනාන්දු යන ත්රිපුද්ගල ශ්රේෂ්ඨාධිකරණ විනිසුරු මඩුල්ලක් හමුවේ සලකා බැලීම සඳහා කැඳවනු ලැබුවා.
පෙත්සම්කරුවන් කියා සිටින්නේ මිනින්දෝරු දෙපාර්තමේන්තුවේ ව්යාපෘති පෞද්ගලික මිනින්දෝරුවන්ට පැවරීමට එරෙහිව දියත් කළ වෘත්තීය සමිති ක්රියාමාර්ගය හේතුවෙන් තමන්ට හිමිවිය යුතු ජූලි සහ අගෝස්තු මාසවලට අදාළ වැටුප් ගෙවීම අත්හිටුවීම තුළින් සිය මුලික අයිතිවාසිකම් උල්ලංඝනය වී ඇති බවයි.
එබැවින් සිය මුලික අයිතිවාසිකම් උල්ලංඝනය වු බවට තින්දු තමන්ට හිමිවිය යුතු අදාළ වැටුප අය කර දෙන ලෙස සිය පෙත්සම මගින් ඉල්ලා තිබෙනවා.
