දුම්රිය දෙපාර්තමේන්තුවේ ගැටලු සම්බන්ධ ව ප්‍රවාහන අමාත්‍යවරයා සහ ජනාධිපතිවරයා අවධානය යොමු නොකළහොත්; හෙට (30) දිනයේ සිට දුම්රිය ස්ථානාධිපතිවරුන් වැඩවර්ජනයකට එළඹෙන බව ශ්‍රී ලංකා දුම්රිය ස්ථානාධිපතිවරුන්ගේ සංගමය නිවේදනය කරනවා.
එම සංගමයේ සභාපති සුමේධ සෝමරත්න මහතා මාධ්‍ය හමුවක් කැඳවමින් අද (29) දිනයේ දී ප්‍රකාශ කළේ; දිනෙන් දින ඔඩුදුවන දෙපාර්තමේන්තුවේ පරිහානිය සහ පරිපාලන ගැටලු පිළිබඳව පසුගිය දිනවල දී වරින්වර මාධ්‍ය තුළින් දැනුවත් කිරීම් සිදු කෙරුණ ද;
පාලන අධිකාරිය සමග සාකච්ඡා කළ ද සාධාරණ විසඳුමක් ඊට නොලැබුණු බවයි.
දුම්රිය සාමාන්‍ය අධිකාරිවරයාගේ නියෝග ක්‍රියාත්මක කිරීමට මැලිවෙන යටත් නිලධාරීන් පිරිසක් සමග ඇති වුණු මෙම ගැටලු සම්බන්ධයෙන් නිසි විසඳුමක් දුම්රිය සාමාන්‍ය අධිකාරියවරයාට අද දිනයේ දී ලබාදීමට නොහැකි වූ බවයි දුම්රිය ස්ථානාධිපතිවරුන්ගේ සංගමය අද පැවති මාධ්‍ය හමුවේදී දැනුම්දුන්නේ.
එබැවින් හෙට දිනයේ දී අමාත්‍යාංශ ලේකම්වරයා හෝ අමාත්‍යවරයා ලබාදෙන සාකච්ඡාවෙන් අනතුරුව මෙම වැඩ වර්ජනය සිදු කරනවා ද නැද්ද යන්න පිළිබඳව තීරණය කෙරෙනු ඇති බවයි දුම්රිය ස්ථානාධිපතිවරුන්ගේ සංගමය වැඩිදුරටත් සඳහන් කළේ.
