ශ්‍රී ලංකා රග්බි ආයතනයෙහි පරිපාලන කටයුතු ඇතුළු අනෙකුත් කටයුතු වලට මැදිහත් වීම වළක්වාලමින් අභියාචනාධිකරණය විසින් ක්‍රීඩා අමාත්‍යවරයා සහ ඔහුගේ නියෝජිතයින් වෙත අතුරු තහනම් නියෝගයක් නිකුත් කළා.
ශ්‍රී ලංකා රග්බි ආයතනයේ කටයුතු අත්හිටුවමින් ක්‍රීඩා අමාත්‍යවරයා විසින් නිකුත් කර තිබෙන ගැසට් නිවේදනය බලරහිත කිරීමේ රිට් ආඥාවක් නිකුත් කරන ලෙස ඉල්ලා එම ආයතනයේ සභාපති රිස්ලි ඉලියාස් විසින් ගොනුකළ පෙත්සමක් මූලික වශයෙන් සලකා බැලීමෙන් අනතුරුව එහි නියෝගය ප්‍රකාශයට පත් කරමින් අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ, මරික්කාර් යන මහත්වරුන්ගෙන් සමන්විත විනිසුරු මඩුල්ලක් මෙම නියෝගය නිකුත් කළේ..
එම තහනම් නියෝගයට අනුව ක්‍රීඩා අමාත්‍යවරයාට සහ ඔහුගේ නියෝජිතයින්ට ශ්‍රී ලංකා රග්බි ආයතනයේ පරිපාලන කටයුතුවලට මැදිහත් වීම තහනම් කෙරෙන තිබෙන බව ද නියෝගයේ සඳහන් වෙනවා.
මෙම අතුරු නියෝගය පෙත්සම් විභාගය අවසන් වන තෙක් බලපැවැත්වෙන බව නියෝගයේ සඳහන් වුණා.
කෙසේ වෙතත් මෙම නඩුවේ විභාගය මාස තුනක් ඇතුළත අවසන් කිරීමට අපේක්ෂා කරන බවයි විනිසුරුවරයා සඳහන් කළේ.
පෙත්සමට අදාළ විරෝධතා තිබේනම් ජුලි මස 25 වනදා ට පෙර ගොනුකරන ලෙස ක්‍රීඩා අමාත්‍යවරයා ඇතුළු වගඋත්තරකරුවන්ට නියෝග කළ අභියාචනාධිකරණ විනිසුරු මඩුල්ල පෙත්සම් විභාගය සැප්තැම්බර් මස 06 වනදා සිදුකරන බවත් නියෝග කළා.
මෙහිදී ක්‍රීඩා අමාත්‍යවරයා වෙනුවෙන් පෙනී සිටි අතිරේක සොලිසිටර් ජෙනරාල් සුමති ධර්මවර්ධන මහතා අධිකරණය හමුවේ කරුණු දක්වමින් ශ්‍රී ලංකා රග්බි ආයතනයේ තහනමට එරෙහිව එහි සභාපතිවරයා ආසියානු රග්බි ආයතනය වෙත ඉදිරිපත් කළ අභියාචනය එම ආයතනය විසින් ප්‍රතික්ෂේප කර ඇති බව අද (14) පෙරවරුවේ විද්‍යුත් තැපෑල මාර්ගයෙන් දැනුම් දී තිබෙන බවත් දන්වා සිටියා.
