යුද්ධය අතරතුර ඉරානය “ලෝකය මවිතයට පත් කර” ඇති බව ඉරානයේ උත්තරීතර නායක මොජ්තාබා කමේනි පවසනවා.
යුද්ධයේ පළමු දිනයේම එක්සත් ජනපද-ඊශ්‍රායල ප්‍රහාරයකින් ඔහුගේ පියා වන අයතුල්ලා අලි කමේනි මිය ගොස් දින 40ක් සපිරීම නිමිත්තෙන් බ්‍රහස්පතින්දා විශේෂ ප්‍රකාශයක් නිකුත් කරමින් ඔහු මේ බව සඳහන් කළා.
“අපේ රටට පහර දුන් අපරාධකාරී ආක්‍රමණිකයන්ට අපි නිසැකවම දඬුවම් නොකර තබන්නේ නැහැ,” ඔහු පැවසුවේ ඉරානය “සියලු හානි සඳහා වන්දි ඉල්ලා සිටින අතර, දිවි පිදූවන්ගේ සහ තුවාල ලැබූවන්ගේ රුධිරය ඉල්ලා සිටින” බවයි.
පෙබරවාරි 28 වන දින යුද්ධය ආරම්භ වූ දා සිට ඉරානය විසින් අවහිර කර ඇති සහ යුද්ධය අවසන් කිරීම සඳහා වන එක්සත් ජනපද-ඉරාන යෝජනාවල ප්‍රධාන කරුණක් බවට පත්ව ඇති හෝර්මුස් සමුද්‍ර සන්ධිය සම්බන්ධයෙන්, කමේනි පැවසුවේ තම රට විස්තර නොකර “නව අවධියක්” කරා ගමන් කරන බවයි.
යුද්ධය අවසන් කිරීම පිළිබඳ සාකච්ඡා ඉරානයේ සහ එක්සත් ජනපදයේ නියෝජිතයින් විසින් හෙට (11) පාකිස්තානයේ දී ආරම්භ කිරීමට නියමිත අතර, ඒ සඳහා වන පරිසරය පාකිස්ථානය මේ වනවිටත් සකසා අවසන් බවයි විදෙස් වාර්තා සඳහන් කළේ.
පාකිස්ථානය මැදිහත් වී සාකච්ඡා පැවැත්වීමට ඉඩ සලසන ගිවිසුමක සති දෙකක සටන් විරාමයකට පසුගිය බදාදා එක්සත් ජනපදය සහ ඉරානය එකඟතත්වයකට පැමිණියා.
සටන් විරාමයේ කොටසක් ලෙස, ඉරානය හෝර්මුස් හරහා නැව්ගත කිරීමට ඉඩදීමට එකඟ වූ අතර, රටේ ප්‍රතිසංස්කරණ කටයුතු සඳහා අරමුදල් සැපයීම සඳහා ටෙහෙරානය, හෝර්මුස් සමුද්‍ර සන්ධිය හරහා ගමන් කරන නැව් සඳහා ගාස්තුවක් පනවනු ඇති බවට වාර්තා පළ වුණා.
කෙසේ වෙතත්, ප්‍රහාර මගින් සතුරුකම්වල විරාමය අවසන් වුවහොත් ප්‍රතිචාර දැක්වීමට ඉරානය සූදානම් බවයි මොජ්තාබා කමේනි අනතුරු ඇඟවා ඇත්තේ.
