නාරාහෙන්පිට මෝටර් රථ ලියාපදිංචි කිරීමේ දෙපාර්තමේන්තුවේ වෙළෙඳ වාහන පැවරුම් අංශයේ නිල කාමරයේ ඉබි යතුරු දමා ආරක්ෂිතව රඳවා තිබූ මෝටර් රථ ලියාපදිංචි කිරීමේ පොත් 12 ක් අස්ථානගත වීමේ සිද්ධියට අදාළව එම අංශයේ කාර්ය මණ්ඩලයේ සේවකයන් 8 දෙනෙකුගේ දුරකථන වාර්තා බොරැල්ල පොලිසියට ලබාදෙන ලෙස කොළඹ අතිරේක මහේස්ත්‍රාත් හර්ෂණ කැකුණවල මහතා අදාළ දුරකථන සමාගම්වලට නියෝග කර තිබෙනවා.
මෙම සිද්ධිය සම්බන්ධයෙන් සිදු කරන විමර්ශන සඳහා අදාළ අංශයේ සේවකයන් අට දෙනෙකුගේ දුරකථන වාර්තා ලබාගත යුතුව ඇති බැවින් එම වාර්තා තම පොලිස් ස්ථානය වෙත ලබාදෙන ලෙස බොරැල්ල පොලිසියේ නඩු මෙහෙයුම් අංශයේ සැරයන් 36052 හේමකුමාර මහතා කරන ලද ඉල්ලීමක් සලකා බලමින් අධිකරණය එම නියෝගය නිකුත් කළා.
මෝටර් රථ දෙපාර්තමේන්තුවේ වෙළඳ වාහන පැවරුම් අංශයේ සහකාර කොමසාරිස්වරයාගේ නිල කාමරයේ කබඩ් එකක් තුළ ඉබි යතුරු දමා ආරක්ෂිතව රඳවා තබා තිබූ මෝටර් රථ ලියාපදිංචි පොත් දහසක් අතුරින් පොත් දොළහක් එසේ අස්ථානගතව ඇති බවට ලැබී ඇති පැමිණිල්ලක් අනුව එම විමර්ශන ආරම්භ කර ඇති බව ද හේමකුමාර මහතා අධිකරණයට දැනුම්දුන්නා.
එසේ අස්ථානගතව ඇති පොත් භාවිතයට නොගත් අලුතින් මුද්‍රණය කළ පොත් බව ද පැවසූ ඒ මහතා අධිකරණය හමුවේ වැඩිදුරටත් කරුණු දක්වමින් කියා සිටියේ සිද්ධිය සම්බන්ධයෙන් අදාළ අංශයේ සහකාර කොමසාරිස්වරයාගෙන් ප්‍රකාශයක් ලබා ගැනීමට පියවර ගත් බවයි.
