මෝගන් ක්‍රිකට් පිටියට ආයුබෝවන් කියයි

2019 ක්‍රිකට් ලෝක කුසලානය ජයග්‍රහණය කළ එංගලන්ත කණ්ඩායමේ නායකයා වන ඔයින් මෝගන් සියලුම ආකාරයේ වෘත්තීය ක්‍රිකට් වලින් විශ්‍රාම යන බව නිවේදනය කර තිබෙනවා.

36 හැවිරිදි මෝගන් වසර 16ක ක්‍රිකට් ක්‍රීඩාවෙන් පසු 2022 ජූලි මාසයේදී ජාත්‍යන්තර ක්‍රිකට් ක්‍රීඩාවෙන් විශ්‍රාම ගියා.

සිය විශ්‍රාම යෑම නිවේදනය කරමින් ඔයින් මෝගන් සඳහන් කළේ “සියලුම ආකාරයේ ක්‍රිකට් ක්‍රීඩාවෙන් සමුගන්නා බව මම ප්‍රකාශ කරන්නේ ඉමහත් ආඩම්බරයකින්. බොහෝ සාකච්ඡා කිරීමෙන් පසුව, මට බොහෝ දේ ලබා දුන් ක්‍රීඩාවෙන් ඉවත් වීමට සුදුසුම කාලය මෙය බව මම විශ්වාස කළා” යනුවෙන්.

“ක්‍රිකට් වලට ස්තූතියි, මට ලොව පුරා සංචාරය කිරීමට සහ ඇදහිය නොහැකි පුද්ගලයින් හමුවීමට හැකි වී තිබෙනවා. ඔවුන්ගෙන් බොහෝ දෙනෙක් සමඟ මම ජීවිත කාලය පුරාම මිත්‍රත්වයන් ගොඩනඟා ගෙන තිබෙනවා. ලොව පුරා සිටින ෆ්‍රැන්චයිස් කණ්ඩායම් සඳහා ක්‍රීඩා කිරීම මට බොහෝ මතකයන් ලබා දී ඇති අතර, එය මා සදහටම මතකයේ රඳවා තබා ගන්නවා.” යනුවෙන් මෝගන් වැඩිදුරටත් සඳහන් කර සිටියා.

2006 වර්ෂයේ දී අයර්ලන්තය සමඟ ඔහුගේ ජාත්‍යන්තර ක්‍රිකට් දිවිය ආරම්භ කිරීමෙන් පසු ඔහු ටෙස්ට් ක්‍රිකට් ක්‍රීඩා කිරීම සඳහා 2009 දී එංගලන්තය සමඟින් එක්වුණා.

කෙසේ වෙතත් මෝගන් සැලකෙන්නේ සීමිත පන්දුවාර තරගවලදී වැඩි දක්ෂතාවක් සහ ඉහළ නායකත්වයක් දැක්වූ ක්‍රීඩකයෙක් ලෙසයි.

ජාත්‍යන්තර ක්‍රිකට් ක්‍රීඩාවෙන් සමුගත් පසු මෝගන් ක්‍රිකට් විස්තර විචාරකයෙකු ලෙස ද කටයුතු කරනු ලැබුවා.