අලුත්ගම මොරගල්ල ප්රදේශයේ සංචාරක හෝටලයක විවේකය ගත කිරීමට පැමිණ සිටි විදේශීය සංචාරකයෙකු දියේ ගිලීමෙන් ජීවිතක්ෂයට පත්වී තිබෙනවා.
වයස අවුරුදු 77ක් වන මෙම පෝලන්ත ජාතිකයා අද පස්වරුවේ එම සංචාරක හෝටලය ආසන්නයේ මුහුදේ දිය නෑමට ගොස් සිටියදීයි අනතුරට ලක්වී ඇත්තේ.
රළ පහරට හසුවූ ඔහු බේරාගෙන බේරුවල රෝහලට ඇතුළත් කිරීමේදී මියගොස් ඇතැයි සඳහන්.
විදෙස් සංචාරකයාගේ මෘත දේහය පශ්චාත් මරණ පරීක්ෂණය සඳහා නාගොඩ ශික්ෂණ රෝහල වෙත යොමු කරන ලෙසටයි බේරුවල හදිසි මරණ පරීක්ෂකවරයා පොලිසියට නියෝග කර ඇත්තේ.
මරණය සම්බන්ධයෙන් අලූත්ගම පොලිසියේ වැඩිදුර පරීක්ෂණ සිදු කරනවා.
