ගෝල 06ට 04ක් ලෙස ප්‍රංශය පරාජය කළ එංගලන්තය 2026 පාපන්දු ලෝක කුසලානයේ තුන්වන ස්ථානය දිනා ගැනීමට අද සමත් වුණා.
ඇමරිකා එක්සත් ජනපදයේ මියාමි ක්‍රීඩාංගණයේ දී පැවති මෙම තරගය ආරම්භයේ සිටම ඉතා තියුණු මුහුණුවරක් ගත්තා.
මෙම තරගයේ දී එංගලන්තය වෙනුවෙන් තෙවන විනාඩියේ දී ඩික්ලැන් රයිස් ගෝලයක් වාර්තා කළ අතර, එම ගොලට වාර්තා කර තවත් මිනිත්තු 15ක් ගතවන මොහොතේ තරගයේ 18 වන විනාඩියේ දී ඉසරි කොන්සා එංගලන්තය වෙනුවෙන් දෙවන ගෝලය වාර්තා කළා.
ඊට අමතරව තරගයේ 37, 46 සහ 87 යන විනාඩිවල බුකායෝ සාකා එංගලන්ත‌යේ ජයගහ්‍රණය තවදුරටත් තහවුරු කරමින් ගෝල ත්‍රිත්වයක් වාර්තා කිරීමට සමත් වුණා.
1966 වසරේ අවසන් මහා තරගයේ දී සර් ජෙෆ් හර්ස්ට්ගෙන් පසු ලෝක කුසලාන පිළිමළුන් පිටුදැකීමේ තරගයක දී ගෝල ත්‍රිත්වයක් වාර්තා කළ දෙවන එංගලන්ත ක්‍රීඩකයා බවට බුකායෝ සාකා පත්වීම ද විශේෂත්වයක්.
මේ අතර ප්‍රංශ කණ්ඩායමට එරෙහිව ගෝල ත්‍රිත්වයක් වාර්තා කළ දෙවන ක්‍රීඩකයා බවට ද බුකායෝ සාකා පත් වූ අතර, මීට පෙර 1958 වසරේ දී සුපිරි බ්‍රසීල පාපන්දු ක්‍රීඩක පේලේ ප්‍රංශ කණ්ඩායමට එරෙහිව ගෝල ත්‍රිත්වයක් වාර්තා කළ පළමු ක්‍රීඩකයා බවට පත් වුණා.
මේ අතර මෙම තරගයේ ප්‍රංශය වෙනුවෙන් කෙලියන් එම්බාබ් විසින් 48 සහ 66 යන විනාඩිවලදී ගෝල රැස් කළ අතර, ප්‍රංශය වෙනුවෙන් වාර්තා වූ අනෙක් ගෝල දෙක බ්‍රැඩ්ලි බර්කෝලා සහ ඖස්මන් ඩෙම්බල් 54 සහ 96 වන විනාඩිවලදී වාර්තා කළා.
ඒ අනුව මෙවර පාපන්දු ලෝක කුසලානයේ තෙවන ස්ථානය සඳහා පැවති තරගය ගෝල 06ට 04ක් ලෙස ප්‍රංශය පරාජය කළ එංගලන්තය ජයගත්තා.
ඒ, අනුව එංගලන්තය 1966 දී ලෝක කුසලානය ජයග්‍රහණය කිරීමෙන් පසු, ඔවුන්ගේ සාර්ථකම ලෝක කුසලාන තරගාවලිය බවට 2026 ලෝක කුසලාන තරගාවලිය පත්කරගනිමින් මෙවර ඔවුන්ගේ ලෝක කුසලාන ගමන අවසන් කළා.
