මෙවර පාසල් නිවාඩුව දෙසැම්බර් 22 වනදා සිට පෙබරවාරි 02 වනදා දක්වා ලබා දෙන බව අධ්‍යාපන අමාත්‍ය ආචාර්ය සුසිල් ප්‍රේම්ජයන්ත් මහතා පවසනවා.
අද (24) පාර්ලිමේන්තුවේදී මන්ත්‍රී සමන්ප්‍රිය හේරත් මහතා යොමු කළ වාචික ප්‍රශ්නයකට පිළිතුරු දෙමිනුයි අධ්‍යාපන අමාත්‍යවරයා මේ බව සඳහන් කළේ.
සාමාන්‍ය පෙළ සහ උසස් පෙළ විභාගවලට මුහුණ දෙන දරුවන් සඳහා වෘත්තීය පුහුණු පාඨමාලා රැසක් ආරම්භ කරන බව ද ඔහු මෙහිදි ප්‍රකාශ කළා. ජාතික අධ්‍යාපන ආයතනය, වෘත්තිය පුහුණු අධිකාරිය සහ විවෘත විශ්ව විද්‍යාලය යන ආයතන සියල්ල එක්වයි මෙම පාඨමාලා ආරම්භ කිරීමට සැලසුම් කර ඇත්තේ.
ඒ අනුව මෙවර උසස් පෙළ විභාගයට පෙනී සිටින 237,000ක් දරුවන්ට එහි පළමු පාඨමාලාව ආරම්භ කරන අතර ලබන දෙසැම්බර් 15න් පසු එම පාඨමාලා ආරම්භ කිරීමට කටයුතු යොදා ඇතැයි අධ්‍යාපන අමාත්‍යවරයා සඳහන් කළා.
“විභාගය අවසන් වෙද්දිම මේ සඳහා අයදුම්පත් කැඳවීම ආරම්භ කරනවා. ඉංග්‍රීසි භාෂාව සහ තොරතුරු තාක්ෂණයට අමතරව තමන් කැමති තාක්ෂණික විෂයයන් දෙකක් තෝර ගන්න පුළුවන්. දරුවන්ට උසස් පෙළ ප්‍රතිඵල ලැබෙන තුරු මාස 04ක් මෙම පාඨමාලාව හදාරන්න පුළුවන්. විශ්ව විද්‍යාල වලට දරුවන් තෝරා පත් කර ගත් පසු ඉතිරු දරුවන් විභාගයක් පවත්වා සුදුසු පාඨමාලාවන් සඳහා තෝරා ගන්නවා. දරුවන්ට ගැළපෙනම වෘත්තියට තමයි පාඨමාලාව ලබා දෙන්නේ. ඉලෙක්ට්‍රොනික් නම් ඉලෙක්ට්‍රොනික් පාඨමාලාව. ප්‍රතිඵල ආවම විශ්ව විද්‍යාල වලට නොයන දරුවන්ට අදාළ තෝරා ගැනීම කළ හැකියි.අඩු ආදායම් ලාභී දරුවන් සඳහා ආධාර ලබා දෙනවා.”
