ශ්‍රී ලංකාවට බටහිර දෙසින් වූ මුහුදේ දී ආපදාවට පත්ව ක්‍රියාවිරහිතව තිබූ ඉන්දීය ධීවර යාත්‍රාවක සිටි ධීවරයින් සිව්දෙනෙක් නිරුපද්‍රිතව මුදාගැනීමට නාවික හමුදාවට ඊයේ (06) හැකිව තිබෙනවා.
2025 ජුනි මස 29 වන දින සිට ඉන්දියානු ධීවර යාත්‍රාවක් අයහපත් කාලගුණික තත්වය හේතුවෙන් පූර්ණ සන්නිවේදන සම්බන්ධතා රහිතව අතුරුදන්ව ඇති බවට ඉන්දියාවේ මුම්බායි සමුද්‍රීය සෙවීම් හා මුදාගැනීම් සම්බන්ධීකරණ මධ්‍යස්ථානය, කොළඹ සමුද්‍රීය සෙවීම් හා මුදාගැනීම් සම්බන්ධීකරණ මධ්‍යස්ථානය වෙත දැනුම් දී තිබුණා.
ඒ, අනුව ශ්‍රී ලංකා නාවික හමුදාව ක්‍ෂණික ප්‍රතිචාර දැක්වීමක් ලෙස ගලවා ගැනීම් මෙහෙයුම් ක්‍රියාත්මක කර තිබෙනවා.
එහිදී වේග ප්‍රහාරක යාත්‍රා යොදවා සිදුකළ විශේෂ සේවීමේ හා මුදාගැනීමේ මෙහෙයුමක් මඟින්, හලාවතට ඔබ්බෙන් වූ බටහිර මුහුදේ ආපදාවට පත්ව ක්‍රියා විරහිතව තිබූ එම ඉන්දීය ධීවර යාත්‍රාව නිරීක්‍ෂණය කළ නාවික හමුදාව, එහි සිටි ඉන්දීය ධිවරයින් සිව්දෙනා නිරුපද්‍රිතව මෙලෙස මුදාගැනීමට කටයුතු කර ඇති බවයි වාර්තා වුණේ.
මෙම මෙහෙයුම මඟින් මුදාගත් ඉන්දීය ධීවරයින් සිව්දෙනා ඉන්දියාවේ මිනිකෝයි දුපතේ පදිංචි පුද්ගලයන් බවට අනාවරණය වී ඇති අතර, එම පිරිස දික්ඕවිට වරායට රැගෙනවිත් අවශ්‍ය වැඩිදුර සහන සැලසීම නාවික හමුදාව සහ වෙරළාරක්‍ෂක බලකාය විසින් සිදු කෙරුණා.
අනතුරුව සිදුකළ මූලික වෛද්‍ය පරීක්‍ෂණයන්ගෙන් පසුව, එම ඉන්දීය ධිවරයින් සිව්දෙනා ඉදිරි කටයුතු සඳහා වත්තල පොලිස් ස්ථානය වෙත භාරදීමට කටයුතුකර තිබුණා.
