මෙරට මුහුදු සීමාව තුළ අනවසර ධීවර කටයුතු සිදු කල ඉන්දීය ධීවර යාත්‍රා පහක් සමඟ ඉන්දීය ධීවරයින් තිස් දෙදෙනෙකු නාවික හමුදා භාරයට ගෙන තිබෙනවා.
ශ්‍රී ලංකා නාවික හමුදාව, ඊයේ (20)දින රාත්‍රී කාලයේ තලෛයිමන්නාරමට හා ඩෙල්‍ෆ්ට් දූපතට ඔබ්බෙන් වූ මෙරට මුහුදු ප්‍රදේශයන්හී සිදුකළ විශේෂ මෙහෙයුම් මඟින් මෙම සැකකරුවන් සිය භාරයට ගත් බවයි නාවික හමුදාව ප්‍රකාශ කළේ.
එහිදී, තලෛයිමන්නාරමට ඔබ්බෙන් වූ මෙරට මුහුදු ප්‍රදේශයේ අනවසර ධීවර කටයුතු සිදු කල ඉන්දීය යාත්‍රා දෙකක් සමඟ ඉන්දීය ධීවරයින් හත් දෙනෙකු සහ ඩෙල්‍ෆ්ට් දූපතට ඔබ්බෙන් වූ මෙරට මුහුදු ප්‍රදේශයේ අනවසර ධීවර කටයුතු සිදු කල ඉන්දීය ධීවර යාත්‍රා තුනක් සමඟ ඉන්දීය ධීවරයින් විසිපස් දෙනෙකු මෙලෙස නාවික හමුදා භාරයට ගෙන තිබෙනවා.
මෙම පුද්ගලයින්ව ඉදිරි නීතිමය කටයුතු සඳහා මන්නාරම සහ මයිලඩි ධීවර පරීක්ෂක කාර්යාලය වෙත භාර දීමට නියමිතයි.
එමෙන්ම 2024 වර්ෂයේ මේ දක්වා සිදුකල මෙහෙයුම් මඟින් මෙරට මුහුදු සීමාව තුල අනවසර ධීවර කටයුතු සිදුකල ඉන්දීය ධීවර යාත්‍රා විසි තුනක් සහ ඉන්දීය ධීවරයින් එකසිය හැත්තෑ අට දෙනෙකු නාවික හමුදාව විසින් අත්අඩංගුවට ගෙන ඉදිරි නීතිමය කටයුතු සඳහා යොමු කර තිබීමද විශේෂත්වයක්.
