මෙරට කොවිඩ් ව්‍යාප්තිය ලෝකයට සාපේක්‍ෂව අඩු අගයක් ගත්ත ද දෛනික.. ආසාදිතයන්ගේ වැඩිවීම නිසා රතු කට්ට පැනීමේ අනතුරක් ඉදිරියේදී මතුවිය හැකි බව නියෝජ්‍ය සෞඛ්‍ය සේවා අධ්‍යක්‍ෂ ජෙනරාල්, විශේෂඥ වෛද්‍ය හේමන්ත හේරත් මහතා ප‍්‍රකාශ කළේය.
මීට සති කිහිපයකට ප‍්‍රථම මෙරටින් දෛනිකව කොවිඩ් ආසාදිතයන් 500ක් හෝ ඊට සුළු වැඩිවීමක් වාර්තා වුවත් මේ වන විට එය 800 සීමාව ඉක්මවා තිබීම යම් සැලකියයුතු තත්ත්වයක් වී ඇතැයි ද හෙතෙම සඳහන් කළේය.
ඊයේ දිනයෙන් අවසන් වූ දින 07ක කාලය තුළ කොවිඩ්-19 ආසාදිතයින් 5,391 දෙනෙකු හඳුනාගෙන තිබේ.
එම කාලය තුළ කොවිඩ් ආසාදිත මරණ 87 ක්ද සෞඛ්‍ය අංශ මගින් තහවුරු කර ඇත.
ඒ අනුව මෙරට සමස්ත කොවිඩ් ආසාදිතයින් සංඛ්‍යාව 601,048ක් වන අතර ඉන් 575,932ක් සුවය ලබා පිටව ගොස් ඇති බව සෞඛ්‍ය අමාත්‍යංශය සඳහන් කරයි.
කොවිඩ් ආසාදිත මරණ 15,284ක් ද මේ වන විට වාර්තා වී තිබේ.
කොවිඩ් වෛරස රෝගය පිළිබඳව ලෝකය දැන ගත් දා පටන් විවිධ ප‍්‍රභේද සහ කොවිඩ් රැලි විවිධාකාරයෙන් පැමිණියත් ශ‍්‍රී ලංකාව දූපතක් වීම හේතුවෙන් ලෝකයට සාපේක්‍ෂව මෙරට කොවිඩ් වැළඳුණු ජන ගණත්වයක් විශාල ලෙස වාර්තා නොවුණු බව ද කියා සිටියේය.
තත්ත්වය එසේ වුවත් ‘ඔමික්‍රෝන්’ විකෘති කොවිඩ් වෛරස ප‍්‍රභේදය මෙරටට ඇතුළුවීමත් සමඟ යළි යම් අවදානම් තත්ත්වයක් නිර්මාණය වෙමින් පවතින නිසා එය ‘රතු කට්ට්’ පැනීම දක්වා වර්ධනය වීමට ඉඩ ලබා නොදී සිටීමේ වගකීම මෙරට සෞඛ්‍ය අංශවලට මෙන්ම රටේ සෑම පුරවැසියකුටම විශාල වගකීමක් තිබෙන බව ද සඳහන් කළේය.
