එළඹෙන ලෝක කුසලානයෙන් පසු තමන් ජාත්‍යනතර එක්දින ක්‍රිකට් පිටියට සමුදෙන බව ඇෆ්ගනිස්ථාන වේග පන්දු යවන ක්‍රීඩක නවීන්-උල්-හක් පවසනවා.
සිය ඉන්ස්ටග්‍රෑම් ගිණුමට සටහනක් එක්කරමින් නවීන්-උල්-හක් සිය එක්දින පිටියේ සමුගැනීම පිළිබඳව දැනුම් දී තිබුණා.
එම සටහනේ ඔහු පවසා ඇත්තේ මෙය පහසු තීරණයක් නොවූවත් එය ඔහුගේ ක්‍රීඩා දිවිය දිගුකර ගැනීමට උපකාරී වනු ඇති බවයි.
තම රට වෙනුවෙන් නිල් පැහැති ජර්සිය විස්සයි විස්ස ක්‍රිකට් ක්‍රීඩාවේ දී දිගටම අඳිනු ඇති බවයි ඔහු එහි වැඩිදුරටත් පවසා ඇත්තේ.
නිමා වූ ආසියානු කුසලානය වෙනුවෙන් ඇෆ්ගනිස්ථානය නියෝජනයට අවස්ථාවක් නොලැබුණු ඔහු මෙවර ඇෆ්ගනිස්ථාන ලෝක කුසලාන සංචිතයට කැඳවා තිබෙනවා.
තවමත් 24 හැවිරිදි වියේ පසුවන ඔහු ලොව පුරා ෆ්‍රැන්චයිස් ලීගවල ප්‍රමුඛ චරිතයක් වී සිටිනවා.
නවීන් ඇෆ්ගනිස්ථානය වෙනුවෙන් ජාත්‍යන්තර එක්දින තරග හතකට පමණක් සහභාගී වී ඇති අතර එහිදී ඔහු කඩුලු 14ක් දවාගෙන ඇත්තේ සාමාන්‍ය 25.42ක් ලෙස රඳවා ගනිමින්.
2016 දී මිර්පූර්හි දී බංග්ලාදේශයට එරෙහිව සිය මංගල එක්දින තරගය ආරම්භ කළ නවීන්-උල්-හක්, ඔහුගේ අවසන් එක්දින තරගය වූයේ 2021 දී අයර්ලන්තයට එරෙහිව අබුඩාබිහිදී පැවති තරගයයි.
