ගාල්ල මහ නගර සභාවේ හිටපු නගරාධිපති වරුන් දෙදෙනෙකු අතර අද (28) පැවති මහ නගර සභා රැස්වීමේදී රැස්වීමේ දී ඇති වූ කතා බහක් දුර දිගයාමෙන් නගර සභා රැස්වීමේ දැඩි උණුසුම්කාරී තත්වයක් නිර්මාණය වුණා.
ගාල්ල මහ නගර සභාව එහි වත්මන් නගරාධිපති ප්‍රියන්ත සහබන්දු මහතාගේ ප්‍රධානත්වයෙන් ගාල්ල මහ නගර සභා රැස්වීම් ශාලාවේ දී අද (28) පරවරු 10. 30 ට රැස්වුණා.
මෙම අවස්ථාවේදී සභාවට සභාවේ ගොඩනැගිලි හා දේපල ආරක්ෂා කරගත යුතු බවට ගෙන එනු ලැබූ යෝජනාවක් විවාදයට ගනු ලැබුවා.
මෙහිදී අදහස් දැක්වූ ගාල්ල මහ නගර සභාවේ හිටපු නගරාධිපතිවරයෙකු මෙන්ම වත්මන් මන්ත්‍රීවරයෙකු වන මෙත්සිරි ද සිල්වා මහතා කරුණු දක්වමින් කාරක සභා අවස්ථාවට ඉදිරිපත් කර තිබූ තොරතුරු කිහිපයක් උපුටා දක්වමිනි නගර සභාවට අයත් දේපල රැසක් විවිධ පුද්ගලයින් අල්ලාගෙන සිටින බව සඳහන් කර සිටියා.
එහිදී නියෝජ්‍ය නගරාධිපති පවුසුල් නියාස් මහතා පවසා සිටියේ කාරක කාරක සභා අවස්ථාවට ඉදිරිපත් කොට ඇති කාරණා මෙහි කියවීම සුදුසු නොවන බවයි.
මේ සමඟම හිටපු නගරාධිපතිවරයකු වන කැලුම් සෙනවිරත්න මහතා මෙත්සිරි ද සිල්වා මහතා දක්වන ලැබූ අදහස්වලට ප්‍රතිචාර දැක්වීමට යාමේදී දෙදෙනා අතර උණුසුම්කාරී කතාබහක් නිර්මාණය වුණා.
එම අවස්ථාවේදී මෙත්සිරි ද සිල්වා මහතා “මෙන්න හොරු” යැයි පවසමින් අදහස් දැක්වීමත් සමඟ කැලුම් සෙනෙවිරත්න මහතා එයට ප්‍රතිචාර දැක්වීමට යාමේදී මෙම තත්ත්වය ඇතිවුණා.
කෙසේ වෙතත් මෙම තත්ත්වය පාලනය කරගැනීමට වත්මන් නගරාධිපති ප්‍රියන්ත සහබන්දු මහතා පියවර ගත් අතර පසුව සභාවේ සාමාන්‍ය කටයුතු සාමාන්‍ය පරිදි සිදු කරගෙන යනු ලැබුවා.
