යතුරුපැදියක් හා වෑන් රථයක් මුහුණට මුහුණ ගැටීමෙන් සිදු වූ රිය අනතුරකින් එක් අයෙකු ජීවිතක්ෂයට පත් ව තවත් දෙදෙනකු තුවාල ලබා තිබෙනවා.
මෙම අනතුර ඊයේ (23) පස්වරුවේ සිදු ව ඇත්තේ ආණමඩුව – නවගත්තේගම මාර්ගයේ 2 කණුව සහ 3
කණුව ප්‍රදේශයේදියි.
අනතුරින් මිය ගොස් ඇත්තේ දිගැන්වැව – දිගැන්නාවත්ත පදිංචිව සිටි රත්නායක මුදියන්සේලාගේ ප්‍රසන්න චාමර රත්නායක නමැති 29 හැවිරිදි පුද්ගලයෙක්.
ඔහු යතුරුපැදිකරු බවත් හෙළි ව තිබෙනවා.
අනතුරට පත් යතුරුපැදියේ පසු පැදිකරු සහ වෑන් රථයේ රියදුරු වන යාපනය – ඉණුවිල් පදිංචිකරුවෙක්
අනතුරින් තුවාල ලබා ආණමඩුව රෝහලට ඇතුළත් කෙරුණා.
යතුරුපැදියේ පසුපැදිකරු බරපතළ තත්ත්වයේ පසු වූ බැවින් ඔහු ව හලාවත මහ රෝහලට මාරුකර යවා ඇති අතර මේ වනවිට ඔහු පසුවන්නේ දැඩි සත්කාර ඒකකයේයි.
අනතුරට පත්ව ඇති යතුරුපැදිය ආණමඩුව දෙස සිට නවගත්තේගම දෙසට ගමන් කරමින් තිබී ඇති අතර යතුරුපැදිය මාර්ගයේ දකුණු පසට ධාවනය වීම හේතුවෙන් ඉදිරියෙන් පැමිණි වෑන් රථයේ ඉදිරිපස ගැටී ඇති බවයි වාර්තා වන්නේ.
