මීගමුව බන්ධනාගාර ගැටුමෙන් දේපළවලට සිදුවූ හානිය ගැන සොයන්න කමිටුවක් – මියගිය නිලධාරින්ට උසස්වීම්

මීගමුව බන්ධනාගාරයේ පසුගියදා ඇති වූ ගැටුමෙන් එහි දේපළවලට සිදුවූ හානිය සම්බන්ධයෙන් සොයා බැලීමට කමිටුවක් පත්කර තිබෙනවා.

මේ අතර මෙම ගැටුම සම්බන්ධයෙන් විමර්ශනය සඳහා බන්ධනාගාර දෙපාර්තමේන්තුව මගින් විශේෂ විමර්ශන කමිටුවක් පත් කිරීමට ද කටයුතු කරනු ලැබුවා.

මෙම ගැටුම සම්බන්ධ විමර්ශන අපරාධ පරීක්ෂණ දෙපාර්තමේන්තුවට භාර කෙරුණු අතර, ඒ අනුව මේ වනවිටත් විමර්ශන නිලධාරීන් විසින් මීගමුව රෝහලේ හා කොළඹ ජාතික රෝහලේ ප්‍රතිකාර ලබන බන්ධනාගාර නිලධාරීන්ගෙන් හා රැඳවියන්ගේ ප්‍රකාශ ලබාගැනීම ආරම්භ කර තිබෙනවා.

ඒ, අනුව කොළඹ ජාතික රෝහලේ ප්‍රතිකාර ලබන නිලධාරීන් හා රැඳවියන් පිරිසකගෙන් මේ වනවිට ප්‍රකාශ සටහන්කරගෙන ඇති බවයි වාර්තා වන්නේ.

මේ අතර මීගමුව බන්ධනාගර ගැටුමෙන් දිවි අහිමි වූ බන්ධනාගාර නිලධාරින් 08 දෙනාට වහාම ක්‍රියාත්මක වන පරිදි උසස්වීම් සහ වන්දි ලබාදීමට බන්ධනාගාර දෙපාර්තමේන්තුව තීරණය කර තිබෙනවා.

මත්ද්‍රව්‍ය ජාවාරමක් පාවාදීමේ සිද්ධියක් මුල් කරගනිමින් මීගමුව බන්ධනාගාරයේ රැඳවියන් දෙපිරිසක් අතර ඇති වූ ගැටුමෙන් බන්ධනාගාර නිලධාරීන් ද ඇතුළුව 100කට අධික පිරිසක් තුවාල ලැබූ අතර, ඉන් 29 දෙනෙකු ජීවිතක්ෂයට පත් වුණා.

ජීවිතක්ෂයට පත් වූ අය අතර, බන්ධනාගාර නිලධාරීන් 08 දෙනෙක් සහ රැඳවියන් 21 දෙනෙකු වනවා.