තමන් මීට මාස කිහිපයකට පෙර අපරාධ පරීක්ෂණ දෙපාර්තමේන්තුවට සිදුකළ පැමිණිල්ල සම්බන්ධයෙන් වන ලිපි ගොනු මේවන විට අස්ථානගත වී ඇති බව මිහින්තලා රජමහා විහාරාධිපති පූජ්ය වලවාහැංගුණවැවේ ධම්මරතන නා හිමියන් පවසනවා.
අද (31) දිනයේ මාධ්ය වෙත අදහස් දක්වමින් උන්වහන්සේ මේ බව සඳහන් කළා.
මෙලෙස තමන් විසින් අපරාධ පරීක්ෂණ දෙපාර්තමේන්තුවට සිදුකළ පැමිණිල්ල අස්ථානගතවීම පිටුපස අදිසි හස්තයක් ක්රියාත්මක බව ද උන්වහන්සේ මෙහිදී සඳහන් කර සිටියා.
උන්වහන්සේ වැඩිදුරටත් සඳහන් කළේ තමන්ට මරණීය තර්ජන සිදුකර කප්පම් ඉල්ලීමේ සිද්ධියක් සම්බන්ධයෙන් මෙම පැමිණිල්ල අපරාධ පරීක්ෂණ දෙපාර්තමේන්තුවට ගොනුකර තිබූ බවයි.
අපරාධ පරීක්ෂණ දෙපාර්තමේන්තුව මේ වනවිට දේශපාලනීකරණය වී ඇති බවත්, මෙවැනි ආකාරයෙන් පැමිණිලි අස්ථානගතවීම හරහා එම දෙපාර්තමේන්තුව කෙරෙහි ඇති විශ්වාසය ද බිඳ වැටී ඇති බවත් උන්වහන්සේ පැවසුවා.
කෙසේ වෙතත් තමන්ට එල්ල වූ මරණීය තර්ජන, කප්පම් ඉල්ලීම සහ තමන්ට අපහාසවන ආකාරයට ව්යාජ ලෙස සැකසූ වීඩියෝපට සම්බන්ධයෙන් ඉදිරියේ දී තවත් පැමිණිල්ලක් අපරාධ පරීක්ෂණ දෙපාර්තමේන්තු හමුවේ ගොනුකරන බවයි මිහින්තලේ විහාරාධිපති නා හිමියන් සඳහන් කළේ.
