වැලිගම, මිරිස්ස ප්‍රදේශයේ විහාරස්ථානයක තිබූ පෞරාණික සහ මිල කළ නොහැකි වෙස් මූණු සොරකමක් සම්බන්ධයෙන් හිමිනමක් ඇතුළු තිදෙනෙක් වැලිගම පොලිසිය විසින් අද (15) අත්අඩංගුවට ගෙන තිබෙනවා.
මිරිස්ස සුනන්දාරාම විහාරස්ථානයේ තිබූ පෞරාණික වෙස් මූණු රැසක් සහ වටිනා පුස්කොළ පොත් රැසක් මෙලෙස සොරාගෙන ඇති බවයි වාර්තා වන්නේ.
සැකකරුවන් විසින් සොරාගත් වෙස් මූණු අතර රාක්ෂ, මනමේ, නාග ආදී වෙස් මුහුණු රැසක් ඇති බවයි අප වාර්තාකරු සඳහන් කළේ.
මෙලෙස විහාරස්ථානයේ තැන්පත් කර තිබූ මෙම වෙස් මූණු වසරකට වරක් පැවැත්වෙන මිරිස්ස ගම්මඩුව ශාන්ති කර්මය සඳහා පමණක් යොදාගන්නා බවත්, දෙස් විදෙස් සංචාරකයන් විශාල පිරිසක් මෙම වෙස් මූණු නැරඹීමට විහාරස්ථානයට පැමිණෙන බවයි තොරතුරු වාර්තා වුණේ.
විහාරස්ථානයේ තිබූ වෙස් මූණු අස්ථානගතවීම සම්බන්ධයෙන් විහාරාධිපති හිමියන් විසින් වැලිගම පොලිසිය වෙත ඉකුත් 07 වනදා සිදුකළ පැමිණිල්ලකට අනුව පොලිසිය විමර්ශන අරඹා තිබෙනවා.
එහිදී විහාරස්ථානයේ පිරිවනේ ආචාර්යවරයෙකු ලෙස කටයුතු කළ වයස අවුරුදු 24ක හිමිනමක්ගෙන් සිදුකළ ප්‍රශ්න කිරීමේ දී අස්ථානගත වූ වෙස් මූණු පිළිබඳ තොරතුරු රැසක් අනාවරණය වූ බවයි පොලිසිය සඳහන් කළේ.
මෙම හිමිනම විසින් මිල කළ නොහැකි එම වෙස් මූණු රැසක් සොරකම් කර ඒවා මාතර ප්‍රදේශයේ පෞරාණික භාණ්ඩ මිලදී ගන්නා අයෙකු වෙත අලෙවි කර ඇති බවයි අනාවරණය වී ඇත්තේ.
ඒ, අනුව මෙම සොරකමට ආධාර අනුබලදීම සම්බන්ධයෙන් පෞරාණික භාණ්ඩ මිලදී ගනු ලබන 62 හැවිරිදි පුද්ගලයා සහ 42 හැවිරිදි තවත් අයෙක් අත්අඩංගුවට ගෙන තිබෙනවා.
වෙස් මූණුවලටට අමතරව මිල කළ නොහැකි පුස්කොළ පොත් විශාල ප්‍රමාණයක් සොරකම් කොට තිබියදී පොලිසිය සොයාගෙන ඇති අතර, සැකකරුවන් වැඩිදුර විමර්ශන කටයුතුවලින් අනතුරුව මාතර මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
