මිලගට මිල වැඩිවන දේ ගැන ඉඟියක්

කිරිපිටි ආනයනික සමාගම් පාරිභෝගික අධිකාරියෙන් ඉල්ලීමක් කර තිබෙනවා.

ඒ, ආනයනික කිරිපිටි මිල ඉහළ දැමීමට අවසර දෙන ලෙස යි.

ලෝක වෙළදපොළේ කිරිපිටි මිල ඉහළ යාම සහ නැව් ගාස්තු ඉහළ යාම මෙම ඉල්ලීමට හේතු ලෙස සඳහන් කර ඇති බවයි වාර්තා වන්නේ.

ආනයනික කිරිපිටි කිලෝ ග්‍රෑම් 1ක පැකට්ටුවක් රුපියල් 350කින් ද, ග්‍රෑම් 400යේ පැකට්ටුවක් රුපියල් 140කින් ද ඉහළ දැමීමට මෙලෙස අවසර ඉල්ලා ඇති බව සඳහන්.

කිරිපිටි කිලෝග්‍රෑම් 1ක පැකට්ටුවක් මේ වන විට අලෙවි වන්නේ රුපියල් 945ක් වැනි මිලකට යි.

ඒ අනුව, ආනයනික කිරිපිටි සමාගම්වල ඉල්ලීම් පරිදි මිල වැඩි කළහොත් කිලෝවක පැකට්ටුවක නව මිල රුපියල් 1,295ක් දක්වා ඉහළ යනු ඇති.

කිරිපිටි ආනයනකරුවන් පවසන්නේ ඇමරිකානු ඩොලර් 2800ක්ව පැවති ලෝක වෙළදපොළේ කිරිපිටි ටොන් එකක් මේ වන විට ඩොලර් 4300 දක්වා ඉහළ ගොස් ඇති බව යි.

එපමණක් නොව ඩොලරයේ අගය ඉහළ යාම හේතුවෙන් ද තම ව්‍යාපාරවලට දැඩි බලපෑම් එල්ල වී ඇති බවයි ඔවුන් පෙන්වා දෙන්නේ.

කෙසේ වෙතත්, පවතින වසංගත තත්ත්වය හමුවේ ජනතාව පත්ව ඇති දුෂ්කරතාවන් සැලකිල්ලට ගෙන මේ මොහොතේ එවැනි මිල ඉහළ දැමීමකට අවසර ලබා දිය නොහැකි බව මේවන විට පාරිභෝගික අධිකාරිය සදහන් කරනවා.

ඉන්ධන මිල ඉහළ යාමත් සමග ඒ පිළිබඳ ආණ්ඩුව වෙත දැඩි බලපෑමක් එල්ල වී ඇති අතර මෙවන් පසුබිමක දී කිරිපිටි මිල ද ඉහළ ගියහොත් එම බලපෑම තවත් වර්ධනය වීමේ හැකියාව ද පවතිනවා.