මියන්මාරයට ශ්‍රී ලංකාවෙන් මානුෂීය ආධාර හා වෛද්‍ය සහන – ජුන්ටාවෙන් චීන ආධාරවලට වෙඩි

මියන්මාරයේ සහන කටයුතු සඳහා ශ්‍රී ලංකා රජය අමෙරිකානු ඩොලර් මිලියනයක මානුෂීය ආධාර මෙන් ම වෛද්‍ය කණ්ඩායම් යෙදවීමට සහ සෞඛ්‍ය අංශයේ සහාය ලබාදීමට සූදානම් බව විදේශ කටයුතු නියෝජ්‍ය අමාත්‍ය අරුන් හේමචන්ද්‍ර පවසනවා.

මේ අතර පසුගිය සිකුරාදා පෙරවරුවේ මියන්මාරයට සහ තායිලන්තයට බලපෑ දරුණු ද්විත්ව භූ කම්පනයෙන් මේ වනවිට පුද්ගලයින් 2886ක් ජීවිතක්ෂයට පත් ව ඇති බවයි රොයිටර්ස් පුවත් සේවය වාර්තා කළේ.

රික්ටර් මාපකයේ 7.7ක් සහ දෙවැනි භූ කම්පනය රික්ටර් මාපක 6.4ක භූ කම්පනයක් ද සිදුවීමෙන් තුවාල ලැබූ ගණන 5000කට ආසන්නයි.

කෙසේවෙතත් මියන්මාරය ජාත්‍යන්තරයේ සහාය ඉල්ලා සිටි අතර ඊට සහාය පළ කිරීමට ඉන්දියාව ද ඉදිරිපත් වුණා.

එවන් පසුබිමක් මතයි ශ්‍රී ලංකාව ද ඊට රජයක් වශයෙන් සහයෝගය ලබාදීමට තීරණය කර ඇත්තේ.

දැඩි ලෙස පීඩාවට පත් සගායිං කලාපයේ ග්‍රාමීය ප්‍රදේශ බොහෝ දුරට හමුදා රජයට එරෙහිව සටන් කරන සන්නද්ධ ප්‍රතිරෝධක කණ්ඩායම්වල පාලනය යටතේ පැවති බව ජාත්‍යන්තර සහන කණ්ඩායම් පවසනවා.

“පාලන තන්ත්‍ර සීමාවන්, ප්‍රාදේශීය පරිපාලනයේ සංකීර්ණ වින්‍යාසය සහ සන්නද්ධ ප්‍රතිරෝධක කණ්ඩායම් මගින් පාලනය කිරීම සහ අඛණ්ඩ ගැටුම් සැලකිල්ලට ගෙන ආධාරවලට ළඟා වීමට ඇති වඩාත්ම අභියෝගාත්මක ඒවා අතර එය වනු ඇත” යනුවෙන් නිවේදනයක සඳහන් බවයි රොයිටර්ස් පවසන්නේ.

භූමිකම්පාවෙන් විපතට පත් වූවන් වෙත ප්‍රවේශ වීමට උත්සාහ කරන ප්‍රතිරෝධක කණ්ඩායම්වලට මියන්මාර ජුන්ටාව විසින් ආධාර රථ පෙළට අනතුරු ඇඟවීමේ වෙඩි ප්‍රහාර ද එල්ල කරනු ලැබුවා.

සිවිල් යුද්ධයක් මධ්‍යයේ සහන සැලසීමේ අභියෝගය අවධාරණය කරමින්, විනාශකාරී භූමිකම්පාවකින් දිවි ගලවා ගත් අයට උපකාර කිරීම සඳහා වඩා හොඳ ප්‍රවේශයක් මියන්මාර ජුන්ටාවෙන් ඉල්ලා තිබෙනවා.

කෙසේවෙතත් ජුන්ටාව සඳහන් කර ඇත්තේ එසේ පැමිණි, චීන රතු කුරුස ආධාර රථ පෙළකට තම හමුදා අනතුරු ඇඟවීමේ වෙඩි තැබූ බවයි.

2021 දී නොබෙල් ත්‍යාගලාභී අවුන් සාන් සූ කීගේ තේරී පත් වූ සිවිල් රජයට එරෙහිව කුමන්ත්‍රණය කිරීමෙන් පසු මියන්මාරය පාලනය කිරීමට හමුදාව අරගල කර ඇති අතර, සිවිල් යුද්ධය ආරම්භ වීමෙන් පසු ආර්ථිකය සහ සෞඛ්‍ය සේවා ඇතුළු මූලික සේවාවන් බිඳ වැටෙමින් තිබෙනවා.