කොළඹ – මඩකලපු ප්රධාන දුම්රිය මාර්ගයේ මින්නේරිය, රොටවැව හන්දිය, 146 වැනි දුම්රිය සැතපුම් කණුව ආසන්නයේ දී වන අලියෙක් දුම්රියක ගැටීමෙන් අනතුරක් සිදුව තිබෙනවා.
කොළොන්නාවේ සිට මඩකලපුව බලා ඉන්ධන ප්රවාහනය කරමින් තිබූ දුම්රියක අද (24) අලුයම මෙම වන අලියා ගැටී ඇති බවයි වාර්තා වුණේ.
වයස අවුරුදු 30ක් පමණවන උස අඩි අටහමාරක් වූ මෙම වන අලියා මින්නේරිය ජාතික උද්යානයේ සිට ආහාර සොයා පැමිණ ආපසු යමින් සිටිය දී මෙම අනතුරට මුහුණ පා තිබෙනවා.
දුම්රියේ ගැටුණු වන අලියා මීටර් දහයක් පමණ ඉදිරියට ඇදී ගොස් මාර්ගයෙන් ඉවතට විසි වී ඇති බවයි අප වාර්තාකරු සඳහන් කළේ.
අනතුර සම්බන්ධයෙන් පරීක්ෂණ මින්නේරිය වනජීවි කාර්යාලය විසින් සිදුකරනු ලබනවා.
