ලියම් ලිවින්ග්ස්ටන් නොදැවී රැස්කළ ලකුණු 62ත් සමඟ ලෝක ශූර ඕස්ට්‍රේලියාවට එරෙහිව ඊයේ (27) ලෝඩ්ස් ක්‍රීඩාංගණයේ පැවැති සිව්වැනි එක්දින තරගයෙන් ලකුණු 186ක දැවැන්ත ජයක් හිමිකර ගන්නට එංගලන්තය සමත් වුණා.
මෙම ජයත් සමඟ තරග පහකින් සමන්විත එක්දින තරගාවලිය තරග 02-02ක් ලෙස සම තත්ත්වයට රැගෙන එන්නට එංගලන්තයට හැකියාව ලැබුණා.
2018 වසරේ දී ට්‍රෙන්ට් බ්‍රිජ්හිදී ලැබූ ලකුණු 242ක දැවැන්ත ජයග්‍රහණයෙන් පසු එක්දින තරගයක දී එංගලන්තය, ඕස්ට්‍රේලියාව පරාජය කළ දෙවන විශාලතම ලකුණු සංඛ්‍යාව මෙය වනවා.
මේ අතර එක්දින තරගයක දී ඕස්ට්‍රේලියානු පන්දු යවන්නෙක් පන්දු වාරයක දී ලබාදුන් ඉහළම ලකුණු සංඛ්‍යාවේ අමිහිරි වාර්තාව මෙම තරගයේ දී වේග පන්දු යවන ක්‍රීඩක මිචල් ස්ටාර්ක්ගේ නම ඉදිරියේ ලියවුණා.
එංගලන්ත ඉනිමේ 39 වන පන්දුවාරය යැවූ මිචල් ස්ටාර්ක් එම පන්දුවාරය තුළ ලකුණු 28ක් ප්‍රතිවාදී එංගලන්තයට ලබා දුන්නා.
මිචල් ස්ටාර්ක් යැවූ එම පන්දුවාරයට එංගලන්ත ක්‍රීඩක ලියම් ලිවින්ග්ස්ටන් හයේ පහර 04ක් සහ හතරේ පහරක් සමඟ (6,0,6,6,6,4) මෙම ලකුණු 28 රැස් කළා.
මේ අතර මෙම තරගයේ දී මිචල් ස්ටාර්ක් පන්දුවාර 08ක් යවා ලකුණු 70ක් ප්‍රතිවාදී එංගලන්තය ලබා දුන්නා.
