මැලේසියාවේ දී අත්අඩංගුවට ගෙන මෙරටට රැගෙන ආ සංවිධානාත්මක අපරාධකරුවෙකු වන කංජිපානි ඉම්රාන්ගේ ප්‍රධාන ගෝලයා බව කියන ‘රත්මලානේ සයිමා’ නැමැත්තා පේරාදෙණිය පොලිස් ස්ථානය වෙත භාරදී තිබෙනවා.
වැඩිදුර විමර්ශන කටයුතු සඳහා එම සැකකරු ඊයේ (10) රාත්‍රියේ පේරාදෙණිය පොලිස් ස්ථානය වෙත රැගෙන ගොස් ඇති බවයි වාර්තා වුණේ.
තොටිවිලගේ ධනුෂ්ක කෞශල්‍ය නොහොත් ‘රත්මලානේ සයිමා’ 41 හැවිරිදි වියේ පසුවන අයෙක් වන අතර, ඔහු 2014 වර්ෂයේ දී පේරාදෙණිය පොලිස් වසමේ දී ගිනිඅවි පෙන්වා පුද්ගලයෙකු පැහැරගෙන ගොස් තුවාල සිදුකිරීම සම්බන්ධයෙන් සහ 2016 වර්ෂයේ දී පුද්ගලයෙකුට වෙඩි තබා ඝාතනයක් සිදුකිරීම සම්බන්ධයෙන් මහනුවර මහේස්ත්‍රාත් අධිකරණයේ විභාග වෙමින් පවතින නඩු දෙකක චූදිතයෙකු වනවා.
රත්මලාන, ජයසුමනාරාම මාවතේ පදිංචිව සිටි මොහු ගල්කිස්ස අධිකරණයෙන් නිකුත් කළ ගුවන් ගමන් තහනමකට ලක් වී සිටි අතර, ජාත්‍යන්තර පොලිසිය මගින් නිකුත් කළ රතු වරෙන්තුකරුවෙකු ද වුණා.
මේ අතර ඔහු සමඟ ඊයේ (10) දිනයේ දිවයිනට රැගෙන ආ අනෙකුත් සැකකරුවන් දෙදෙනා අද (11) දින මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබෙනවා.
ගල්කිස්ස ප්‍රදේශයේ පදිංචි 31 හැවිරිදි වියනගේ ඉෂාර සලින්ද කුමාර සහ රත්මලාන ප්‍රදේශයේ පදිංචි 35 හැවිරිදි වියේ පසුවන ලද්දු හෙන්නැදිගේ ලසන්ත ලක්මාල් සිල්වා නැමති අය ද මෙලෙස මැලේසියාවේ දී අත්අඩංගුවට ගෙන ඊයේ (10) පස්වරුවේ කටුනායක ගුවන් තොටුපොළ වෙත රැගෙන එනු ලැබුවා.
