මැදපෙරදිගින් සිදුකරන බොරතෙල් ආනයනය මත පවතින දැඩි යැපීම අඩු කිරීමේ අරමුණින් ගැඹුරු මුහුදේ තෙල් සහ ගෑස් ගවේෂණ කටයුතු සඳහා ඉන්දියාව ඩොලර් බිලියන 8.8කට ආසන්න මුදලක් ආයෝජනය කිරීමට සැලසුම් කර තිබෙනවා.
ඉන්දීය රුපියල් බිලියන 730ක් පමණ වන මෙම ආයෝජනය, රාජ්ය බලශක්ති සමාගමක් වන Oil and Natural Gas Corporation – ONGC ඇතුළු රාජ්ය හා පෞද්ගලික බලශක්ති සමාගම් එක්ව ක්රියාත්මක කිරීමට නියමිතයි.
ඉන්දියාවේ නැගෙනහිර වෙරළට ඔබ්බෙන් පිහිටි ක්රිෂ්ණා-ගෝදාවරි හෙවත් KG ද්රෝණියේ අති ගැඹුරු මුහුදු ප්රදේශවල තෙල් සහ ගෑස් සම්පත් ගවේෂණය කිරීම මෙන්ම අන්දමන් මුහුදේ මෙතෙක් ගවේෂණය නොකළ ප්රදේශ වෙත අවධානය යොමු කිරීම මෙහි ප්රධාන අරමුණ වී තිබෙනවා.
ඉන්දියාව දැනට සිය බොරතෙල් අවශ්යතාවයෙන් සියයට 85කට වැඩි ප්රමාණයක් ආනයනය කරන අතර, එමඟින් මැදපෙරදිග දේශපාලන අස්ථාවරත්වය සහ සැපයුම් මාර්ගවල ඇතිවන බාධා හමුවේ ඉන්දීය ආර්ථිකය දැඩි අවදානමකට ලක්වනවා.
ඒ අනුව ගැඹුරු මුහුදේ කැණීම් සඳහා නවීන තාක්ෂණයෙන් යුත් විදුම් නෞකා, මුහුදු පතුලේ නිෂ්පාදන පද්ධති සහ අති ගැඹුරු මුහුදේ මෙහෙයුම් කළ හැකි පාවෙන තෙල් නිෂ්පාදන හා ගබඩා නෞකා සඳහා ආයෝජනය කිරීමට ඉන්දියාව අපේක්ෂා කරනවා.
එමෙන්ම සංකීර්ණ ගැඹුරු මුහුදු තෙල් ගවේෂණ තාක්ෂණය සහිත ජාත්යන්තර ප්රධාන පෙළේ තෙල් සමාගම් සමඟ හවුල් ව්යාපාර ඇති කර ගැනීමටද ඉන්දියාව සැලසුම් කර තිබෙනවා.
බෙංගාල බොක්ක ආශ්රිත KG ද්රෝණියේ පවතින බවට හඳුනාගෙන ඇති තෙල් සහ ස්වභාවික ගෑස් සම්පත් වාණිජ වශයෙන් නිෂ්පාදනයට ගැනීම කඩිනම් කිරීමද මෙම වැඩපිළිවෙළේ ප්රධාන අංගයක්.
ලොව විශාලතම ජනගහනයක් සහිත රටක් වන ඉන්දියාවේ වේගවත් ආර්ථික වර්ධනය සමඟ ඉහළ යන බලශක්ති අවශ්යතාව සපුරාලීම සඳහා දේශීය බලශක්ති නිෂ්පාදනය පුළුල් කිරීම අත්යවශ්ය බව ඉන්දීය බලධාරීන් පෙන්වා දෙනවා.
පුනර්ජනනීය බලශක්තිය සහ හරිත හයිඩ්රජන් ඇතුළු පිරිසිදු බලශක්ති ක්ෂේත්ර වෙතද ඉන්දියාව අවධානය යොමු කරමින් සිටියද, ඉදිරි දශක ගණනාව තුළ පොසිල ඉන්ධන එරට බලශක්ති මිශ්රණයේ ප්රධාන කොටසක් වනු ඇති බව බලශක්ති විශ්ලේෂකයෝ පවසනවා.
ඒ අනුව දේශීය ගැඹුරු මුහුදු තෙල් නිෂ්පාදනය ඉහළ නැංවීම මඟින් ඉන්දියාවේ බලශක්ති සුරක්ෂිතතාව ශක්තිමත් කර, ජාත්යන්තර තෙල් වෙළෙඳපොළේ ඇතිවන කම්පන සහ මැදපෙරදිග සැපයුම් අවදානම්වලට ඇති නිරාවරණය අඩු කිරීම ඉන්දීය රජයේ ප්රධාන අරමුණ වී තිබෙනවා.
