මැදපෙරදිග කලාපයේ ආරම්භ වී ඇති යුදමය තත්ත්වය කුමන තත්ත්වය දක්වා වර්ධනය වේවිද යන්න සම්බන්ධයෙන් කාටත් පවතින්නේ අවිනිශ්චිත තත්ත්වයක් බව ජනාධිපති අනුර කුමාර දිසානායක පවසනවා.
අද (03) පාර්ලිමේන්තුවේ දී මැදපෙරදිග යුදමය තත්ත්වය පිළිබඳ රජයේ ස්ථාවරය සම්බන්ධයෙන් විශේෂ ප්‍රකාශයක් සිදුකරමින් ජනාධිපතිවරයා මේ බව සඳහන් කළා.
පවතින තත්ත්වය මත මෙරට ආර්ථිකයට සිදුවිය හැකි බලපෑම පිළිබඳව සමාලෝචන වාර්තාවක් හෙට (04) දිනයේ දී ශ්‍රී ලංකා මහ බැංකුව ලබාදීමට නියමිත බවයි ජනාධිපතිවරයා පැවසුවේ.
එමෙන්ම මැදපෙරදිග ඇතිව තිබෙන යුදමය තත්ත්වය පාලනය කිරීමට ඊට සම්බන්ධ සියලු පාර්ශවයන් ඉතා ඉක්මනින්ම සාමකාමී ලෝකයක් වෙනුවෙන් අවශ්‍ය කැපවීම සහ මඟපෙන්වීම සිදුකළ යුතු බවයි ජනාධිපති අනුර කුමාර දිසානායක මෙහිදී වැඩිදුරටත් සඳහන් කළේ.
මේ අතර යුදමය තත්ත්වයත් සමඟ මෙරට ඇතිවන අර්බුදයට විසඳුම් තනි තනිව සෙවිය නොහැකි බව සඳහන් කළ ජනාධිපතිවරයා, සමස්ත අර්බුදයේ විසඳුම් මාවත සෙවීමේ දී රජයට ප්‍රධාන වගකීමක් ඇති බවත්, සමස්ථ පාර්ලිමේන්තුවටම අත් හැරීමට නොහැකි වගකීමක් පවතින බවයි.
