මැණික් හා ස්වර්ණාභරණ කර්මාන්තය ආශ්රිතව මතුව ඇති ගැටළුවලට විසඳුම් ලබාදෙමින් එම ක්ෂේත්රයේ නිරතවූවන්ට සහන ලබා දීමට කටයුතු කරන බව ජනාධිපති රනිල් වික්රමසිංහ පවසනවා.
මේ මොහොතේ බදු ප්රතිපත්තියේ වෙනසක් සිදුකළ නොහැකි නමුත් මැණික් හා ස්වර්ණාභරණ කර්මාන්තය ශක්තිමත් කිරීම වෙනුවෙන් සුදුසු ක්රමවේදයක් සකස් කරන බව සඳහන් කළ ජනාධිපතිවරයා රාජ්ය සහ පෞද්ගලික දෙඅංශයේම දායකත්වයෙන් මෙම ගැටළු විසඳාගැනීමට අදාළ යෝජනාවලියක් සකස් කර සති දෙකක් ඇතුළත ලබා දෙන ලෙස ද නිලධාරීන්ට උපදෙස් ලබා දුන්නා.
ජනාධිපති රනිල් වික්රමසිංහ මේ බව සඳහන් කර සිටියේ මැණික් හා ස්වර්ණාභරණ ක්ෂේත්රයේ නිරතවූවන් සමඟ ඊයේ (15) පස්වරුවේ ජනාධිපති කාර්යාලයේ පැවති සාකච්ඡාවකදීයි.
මැණික් හා ස්වර්ණාභරණ කර්මාන්තයට බලපා ඇති රජයේ නව බදු ප්රතිපත්ති පිළිබඳ ගැටළු ඇතුළු කර්මාන්තය ආශ්රිත මතුව ඇති වෙනත් ගැටළු පිළිබඳව මෙහිදී දීර්ඝ ලෙස සාකච්ඡා කෙරුණා.
මෙහිදී වැඩිදුරටත් අදහස් දැක්වූ ජනාධිපති රනිල් වික්රමසිංහ සඳහන් කළේ මෙරට මැණික් කර්මාන්තය ආශ්රිත අපනයනය වැඩි කිරීමට මෙන්ම අගය එකතු කිරීම් කෙරෙහි ද අවධානය යොමු කළ යුතු බවයි.
එමෙන්ම ඉදිරියේ දී සබරගමුව පළාත සහ නුවරඑළිය දිස්ත්රික්කය ආශ්රිත ප්රදේශවල පතල් ව්යාපාර ආරම්භ කිරීමට සැලසුම් කර ඇති බව පෙන්වා දුන් ජනාධිපතිවරයා ඒ අනුව එම ප්රදේශවල පතල් ව්යාපාර ආරම්භ කිරීමට මෙරට මැණික් ව්යාපාරිකයන්ට පූර්ණ වශයෙන් අවස්ථාව හිමිවන බව ද සඳහන් කළා.
එසේම ශ්රී ලංකාවේ අනෙකුත් ප්රදේශ ආශ්රිතව ද මැණික් හා පතල් ව්යාපාර ආරම්භ කළ හැකිදැයි විමසා බැලීම සඳහා සමීක්ෂණයක් සිදු කිරීමට අපේක්ෂා කරන බව ද ජනාධිපතිවරයා පැවසුවා.
