මාස කිහිපයක් තුළ එකම පුද්ගලයෙකුට ලොතරැයි සුපිරි ත්‍යාග දෙකක්

ඇමරිකාවේ මේරිලෑන්ඩ් ප්‍රාන්තයේ බැල්ටිමෝර් නගරයේ පුද්ගලයෙකු දෙවන වතාවටත් ලොතරැයියකින් දැවැන්ත මුදල් ත්‍යාගකය් දිනාගෙන තිබෙනවා.

ඇමසන් සමාගමේ සේවකයෙකු වන ඔහු ඩොලර් 5ක් ගෙවා මිලදී ගත් සූරන ලොතරැයියට ඩොලර් 50,000 ක ත්‍යාගයක් ලැබී ඇති බවයි විදෙස් මාධ්‍ය වාර්තා කළේ.

මාස කිහිපයක් ඇතුලත ඔහු දිනා ගත් දෙවන විශාල ත්‍යාගය මෙය ලෙසට සැලකෙනවා.

56 හැවිරිදි මෙම පුද්ගලයා පසුගිය ජනවාරි මාසයේදී ද මේ හා සමාන ලොතරැයියකින් ඩොලර් 30,000ක ත්‍යාගයක් දිනාගෙන ඇති බව මේරිලන්ඩ් ලොතරැයි මණ්ඩලය නිවේදනයක් නිකුත් කරමින් කියා සිටියා.

ඔහු මෙම මාසයේ ත්‍යාගය දිනා ගෙන ඇත්තේ මත්පැන් අලෙවිසැලක දී සූරන ලොතරැයියක් මිලදී ගැනීමෙන් පසුවයි.

මෙම දිනුම හිමිවීම තමාට විශ්වාස කිරීමට නොහැකි වූ බව නම සඳහන් නොකළ මෙම ජයග්‍රාහකයා ප්‍රකාශ කර තිබෙනවා.

මෙම පුද්ගලයා ලොතරැයි මණ්ඩල නිලධාරීන්ට පවසා ඇත්තේ මෙම ජයග්‍රාහී මුදල් වියදම් කරන්නේ කෙසේදැයි මෙතෙක් තීරණය කර නොමැති නමුත් තම පෙම්වතියගේ 60 වැනි උපන්දිනය වෙනුවෙන් ඇය සමඟ නිවාඩුවක් ගත කළ හැකි බවයි.

ඔහු නව මෝටර් රථයක් මිලදී ගැනීමට බලාපොරොත්තුවෙන් සිටින බව නිලධාරීන් වැඩිදුරටත් සඳහන් කර තිබෙනවා.

ජහග්‍රාහී ඩොලර් 50,000 ත්‍යාගය ඔහු මිල දී ගත් සූරන ටිකට් පතක් සඳහා ලබා ගත හැකි ඉහළම ජයග්‍රහණය ද වනවා.

Crazy 8s නම් මෙම ලොතරැයිය මගින් ත්‍යාග ලක්ෂ ගණනක් ප්‍රදානය කළ ද බොහෝමයක් ත්‍යාග ඩොලර් 5 සිට 1,000 දක්වා අතර පරාසයක පමණක් පවතින බවයි විදෙස් මාධ්‍ය වාර්තා පෙන්වා දෙන්නේ.

ඔහු ලොතරැයි මිලදී ගත් මත්පැන් අලෙවි සැලට ද Maryland Lottery වෙතින් ඩොලර් 500ක ප්‍රසාද දීමනාවක් ලැබෙනු ඇති.

මේ අතර පසුගිය 4 වනදා කැනඩාවේ සරසවි සිසුවියක් ඇය සිය ජීවිතයේ මිලදී ගත් පළමු ලොතරැයියෙන් ම සුපිරි ත්‍යාගය ජයග්‍රහණය කළා. ඇය ජයග්‍රහණය කළ මුදල ඩොලර් මිලියන 48ක්.