අනුරාධපුර, නොච්චිකුලම් වැව ප්‍රතිසංස්කරණය වෙනුවෙන් එම වැවේ වතුර ඉවත්කොට මාසයකට අධික කාලයක් ගත වුවත් මෙතෙක් කිසිදු ප්‍රතිසංස්කරණයක් සිදුනොවීම හේතුවෙන් තමන් දැඩිලෙස පීඩාවන්ට පත්ව ඇතැයි ප්‍රදේශවාසී ජනතාව පවසනවා.
මේ වසරේ වර්ෂාව ආරම්භ වීමට තවත් සුලු කාලයක් ඉතිරිව ඇති අතර, වර්ෂාව ආරම්භ වීමට පෙර වැව පිලිසකර කිරීමට නොහැකි වීමේ දැඩි අවධානමක් පවතින බව ප්‍රදේශවාසීන් වැඩිදුරටත් සඳහන් කළා.
එසේ වුවහොත් ගොවීන්ට මහ කන්නයේ ගොවිතැන් කිරීමට ද නොහැකි වීමේ අවධානමක් පවතින බවට නොච්චිකුලම් ගොවිසංවිධානය පෙන්වා දෙනවා.
නොච්චිකුලම් වැව ප්‍රතිසංස්කරණය කිරීම සඳහා ටෙන්ඩර් කැඳවා ලංසු තිබීමේ දී ඇති වූ ගැටලුවක් හේතුවෙන් මෙම වැව ප්‍රතිසංස්කරණයට ප්‍රමාදවන බවයි වාර්තා වන්නේ.
වැව ප්‍රතිසංස්කරණය වෙනුවෙන් ලංසු තැබූ කොන්ත්‍රාත් ආයතනයක් විසින් අභියාචනයක් ඉදිරිපත් කිරීම මත වැව ප්‍රතිසංස්කරණය කිරීමට ප්‍රමාද වී ඇතැයි පළාත් වාරිමාර්ග ඉංජිනේරු කාර්යාලයේ නිලධාරීන් අප කළ විමසීමකදී සඳහන් කළා.
අදාළ අභියාචනය සම්බන්ධයෙන් වහාම සොයා බැලීමට කම්ටුවක් පත්කොට ඇතත් කමිටුවේ වාර්ථාව ලැබීමට ප්‍රමාද වීම මෙන්ම වැව ප්‍රතිසංස්කරණය කිරීම සඳහා කොන්ත්‍රාත් ආයතනයක් තෝරා නොගැනීම හේතුවෙන් නොච්චිකුලම් ජනතාව දැඩි පීඩාවන්ට පත්ව සිටිනවා.
