ශ්‍රී ලංකාවේ මහ මැතිවරණ ඉතිහාසයේ දී තනි පක්ෂයක් සන්ධානගත නොවී ලද විශාලම වාර්තාගත ජයග්‍රහණය ඊයේ (15) නිමාවට පත් වූ පාර්ලිමේන්තු මැතිවරණයේ දී වාර්තා වුණු ප්‍රතිඵල අනුව දැකිය හැකි වනවා.
ඒ අනුව යම් කිසි තනි පක්ෂයක් මහ මැතිවරණයක දී ලබාගත් වැඩිම ඡන්ද ප්‍රතිශතය 61.56%ක් ලෙස ලබාගන්නට ජාතික ජන බලවේගයට හැකි වුණා.
එම වාර්තාව මීට පෙර තබා තිබුණේ 2010 වර්ෂයේ දී එක්සත් ජනතා නිදහස් සන්ධානය විසින් තම ඡන්ද ප්‍රතිශතය 60.33%ක් ලෙසට පත් කරගනිමින්.
මහ මැතිවරණයක ජයගත් වැඩිම ඡන්ද කොට්ඨාස ගණන 152ක් ලෙස සටහන් කරගත් මාලිමා රජය මීට පෙර 2010 දී එක්සත් ජනතා නිදහස් සන්ධානය විසින් කොට්ඨාස 136ක් දිනාගනිමින් තැබූ වාර්තාව ද බිඳ දැමුවා.
වැඩිම දිස්ත්‍රික්ක ගණනක් මැතිවරණයක දී ජයග්‍රහණය කළ පක්ෂය බවට දිස්ත්‍රික්ක 21ක් දිනාගත් මාලිමාව මීට පෙර 2010 දී එක්සත් ජනතා නිදහස් සන්ධානය දිස්ත්‍රික්ක 19ක් දිනූ වාර්තාව ද බිඳ දැමුවා.
ඊට අමතරව;
*මහ මැතිවරණයක ලබාගත් වැඩිම ඡන්ද සංඛ්‍යාව: 6,863,186 (මීට පෙර 2020දී පොදුජන පෙරමුණ ඡන්ද 6,853,960)
*දිස්ත්‍රික් මට්ටමින් දිනාගත් වැඩිම ආසන ගණන: 141 (මීට පෙර 2020දී පොදු ජන පෙරමුණ ආසන 128)
*වැඩිම (සියලුම) දිස්ත්‍රික්ක සංඛ්‍යාවක් තැපැල් ඡන්ද දිනාගත් අවස්ථාව (21)
*දකුණේ පක්ෂයක් උතුරු නැගෙනහිර ලබාගත් වැඩිම ජන්ද හා ආසන සංඛ්‍යාව
*මහ මැතිවරණයක වැඩිම ජාතික ලැයිස්තු ආසන: 18 (මීට පෙර 2020දී පොදුජන පෙරමුණ ආසන 17)
*මහ මැතිවරණයක ජයග්‍රහණය කළ වැඩිම ආසන: 159 (මීට පෙර 2020දී පොදුජන පෙරමුණ ආසන 145)
*සමානුපාතික ක්‍රමය යටතේ පාර්ලිමේන්තුවේ ආසන 225න් 2/3ක් ආසන තනි පක්ෂයක් විසින් දිනාගත් පළමු අවස්ථාව
*මීට පෙර මැතිවරණයේ 3% මට්ටමේ සිට රටක ඉතිහාසයේ මෙතරම් වාර්තා පිහිටවූ පළමු අවස්ථාව ලෙසයි මෙවර පාර්ලිමේන්තුව දිනූ ජාතික ජන බලවේගය ඉතිහාසගත වන්නේ.
