වත්මන් රජය පුනර්ජනනීය බලශක්තිය ප්‍රවර්ධනය කර, පවතින ඉන්ධන මාෆියාව වෙනස් කර ක්‍රමයේ වෙනසකට යන බවට පොරොන්දු වුවත් අද වන විට එම ක්‍රමයේ වෙනස වචනවලට පමණක් සීමා වී ඉන්ධන බලශක්ති මාෆියාව ප්‍රවර්ධනය කරන තැනට පත්ව ඇති බව විපක්ෂ නායක සජිත් ප්‍රේමදාස පවසනවා.
වහල මත සවිකරන සූර්ය බලශක්තියට ගෙවන කෝෂක පැනල් ගාස්තුව ගෙවීම කිලෝවෝට් පැයකට රුපියල් 37 සිට 20 දක්වා 45%කින් අඩු කර ඇති බවත්, මින් සූර්ය බලශක්තිය ප්‍රවර්ධනය වීම නොව පුනර්ජනනීය බලශක්ති ක්ෂේත්‍රයට යොමුවන බොහෝ දෙනා ඉන් ඉවත් කිරිම සහ ඉන්ධන බලශක්ති මාෆියාව තවත් ශක්තිමත් කිරීම සිදුවන බවත් විපක්ෂ නායකවරයා අද (21) විශේෂ ප්‍රකාශයක් සිදුකරමින් පැවසුවා.
රජය ගෙන ඇති මෙම පියවර හේතුවෙන් කුඩා ව්‍යාපාරිකයන් විශාල ප්‍රමාණයක් සූර්ය බලශක්ති ව්‍යවසායකයන් විශාල පිරිසක් අගතියට පත්ව ඇති බවත්, ව්‍යාපාර 1,000ක පමණ සේවය කරන 40,000 කට වැඩි ප්‍රමාණයකට මේ කෝෂක පැනල ගාස්තු 45%කින් අඩු කිරිම නරක ලෙස බලපා ඇති බවත් ඔවුන්ගේ රැකියා ද අවදානම් තත්ත්වයකට පත්ව ඇති බව ඔහු වැඩිදුරටත් සඳහන් කර සිටියා.
