තමා රටේ ජනතාව වෙනුවෙන් විපක්ෂයේ සිට සේවය කිරීමට විවිධ පාර්ශව දෝෂාරෝපණයට ලක් කරන බවත් අවැසි නම් මුදල් උපයෝගී කරගෙන පක්ෂයේ සහ තමාගේ ප්රතිරූප ගොඩනගා ගැනීම මෙන්ම සමාජ මාධ්ය හරහා බොරු ස්ථාපිත කිරීමට හැකියාව තිබුණත් එවැනි දෑ නොකර සැබවින්ම ජනතාවට සේවයක් ඉටු කළ බවත් විපක්ෂ නායක සජිත් ප්රේමදාස පවසනවා.
දිට්වා ආපදා සමයේ විපතට පත් ජනතාව විවිධ දෑ ලබාදෙන බවට පැවසුව ද ඒ කිසිවක් සිදු නොකර දුකට පත් ජනතාව සමඟ සමාජ මාධ්ය තුළ ඡායාරූප සහ විඩියෝ පළ කිරීමට රජයේ පාර්ශ්වය කටයුතු කළ අතර අදටත් දිට්වා නිසා අසරණ වූ ජනතාව තවත් අසරණ වී ඇති බව ද විපක්ෂ නායකවරයා පෙන්වා දෙනවා.
අදටත් වගා හානි දේපල හානි ජීවිත හානි විකල්ප ඉඩම් හා නිවාසවලට උත්තර නොමැති බවට පෙන්වා දෙන විපක්ෂ නායකවරයා මේ වනවිට සෑම දිනකම ජනතාව ජාතික ජන බලවේගයට රැවටෙමින් සිටින බවත් ඔහු සඳහන් කළා.
විපක්ෂ නායක සජිත් ප්රේමදාස මේ බව කියා සිටියේ අද (25) හොරොව්පතාන, වගොල්ලාගොඩ, බෝධිරුක්ඛාරාම මහා විහාරයේ සුවිසල් ධර්ම ශාලාව ගොඩනැගීම වෙනුවෙන් මුල් ගල් තැබීමේ අවස්ථාව හා එක්වෙමින්.
