හලාවත – කොළඹ මාර්ගයේ වෙන්නප්පුව – දුම්මලදෙණිය ප්රදේශයේ දී බස් රථයක් මෝටර් කාර් රථයක ගැටීමෙන් සිදු වූ අනතුරකින් කාන්තාවක් ජීවිතක්ෂයට පත් වුණා.
අද (17) අලුයම 04.30ට පමණ මෙම අනතුර සිදු ව ඇති බවයි දසත ප්රාදේශීය වාර්තාකරු පැවසුවේ.
අනතුරින් මිය ගොස් ඇත්තේ වෙන්නප්පුව – මැද දුම්මලදෙණිය පදිංචිව සිටි සමරක්තොඩි මුදියන්සේලාගේ ප්රියංකා ලක්මිණී නමැති 53 හැවිරිදි කාන්තාවක්.
ඇය හලාවත ගොවිජන සේවා කාර්යාලයේ සේවය කරමින් සිටි අයෙක්.
අනතුරින් මිය ගොස් ඇති කාන්තාවගේ දරුවෙකු නිවසේ දී හදිසි රෝගී තත්ත්වයට පත් ව ඇති අතර ඇය සිය ස්වාමිපුරුෂයා සමග දරුවාට ප්රතිකාර ලබාදීමට යමින් සිටියදියි මෙම අනතුරට මුහුණපා ඇත්තේ.
මෝටර් කාර් රථයේ සිටි දරුවා එක්වරම ඉන් බිමට බැස හලාවත – කොළඹ ප්රධාන මාර්ගය හරහා දිව ගොස් තිබෙනවා.
එම අවස්ථාවේදී ලංකා ගමනාගමන මණ්ඩලයේ කිලිනොච්චිය ඩිපෝවට අයත් බස් රථයක් යාපනයේ සිට කොළඹ බලා ධාවනය වෙමින් තිබූ බවත් මාර්ගය හරහා දිව යන දරුවා දැක බස් රථයේ රියදුරු එහි තිරිංග තද කර තිබෙනවා.
නමුත් පැවති වැසි තත්ත්වය හේතුවෙන් ලිස්සා ගොස් ඇති බස් රථය මාර්ගය අයිනේ නවතා තිබූ මරණකාරිය පැමිණ ඇති මෝටර් රථයේ ගැටී ඇති බවයි පැවසෙන්නේ.
බස් රථයේ ගැටුණු මෝටර් රථය විසිවී ගොස් දරුවා බේරා ගැනීමට රථයෙන් බැස සිටි කාන්තාවගේ ගැටීමෙන් අනතුර සිදු වී තිබෙනවා.
අනතුරින් තුවාල ලබා සිටි කාන්තාව ප්රතිකාර සඳහා එම අවස්ථාවේදී ම මාරවිල මූලික රෝහලට ඇතුළත් කර ඇති නමුත් ඇය මිය ගොස් ඇති බවයි රෝහල් නිලධාරීන් පවසා ඇත්තේ.
අනතුරට සම්බන්ධ බස් රථය පැදවූ රියදුරුව වෙන්නප්පුව පොලීසියේ රථ වාහන අංශය විසින් අත්අඩංගුවට ගෙන තිබෙනවා.
