ශ්‍රී ලංකාවේ වනාන්තර ප්‍රදේශවලට මායිම්ව ඇති ප්‍රධාන මාර්ගවලට පැමිණෙන වන අලින්ට ආහාර ලබාදෙන පුද්ගලයන්ට එරෙහිව නීතිමය පියවර ගන්නා බව වනජීවී සංරක්ෂණ දෙපාර්තමේන්තුව අනතුරු අඟවනවා.
එම දෙපාර්තමේන්තුවේ අධ්‍යක්ෂ ජනරාල් එම්.ජී.සී.සූරියබණ්ඩාර ප්‍රකාශ කර ඇත්තේ වෘක්ෂලතා හා වනසත්ව ආරක්ෂණ ආඥාපනතේ විධිවිධානවලට අනුව මහ මගදී වන අලින්ට ආහාර ලබාදීම වරදක් ලෙස සලකන බවයි.
ප්‍රධාන මාර්ගවලට පැමිණෙන වන අලින්ට ආහාර ලබා දීමට ජනතාව කටයුතු කිරීම හේතුවෙන් එම සතුන් ආහාර සොයා යළි මාර්ගවලට පැමිණීම පුරුද්දක් කර ගෙන ඇති බවයි එම දෙපාර්තමේන්තුව සඳහන් කළේ.
මේ හේතුවෙන් වන අලි ආහාර සොයා ප්‍රධාන මාර්ගවල වාහනවලට බාධා කිරීමේ සිදුවීම් ඉහළ ගොස් ඇති බව ද ඒ මහතා වැඩිදුරටත් පෙන්වා දෙනවා.
ශ්‍රී ලංකාවේ වනාන්තර ප්‍රදේශවලට මායිම්ව ඇති ප්‍රධාන මාර්ගවලට පැමිණෙන වන අලින්ට ආහාර ලබාදීමෙන් වළකින ලෙස ජනතාවගෙන් ඉල්ලා සිටින බවයි සූරියබණ්ඩාර මහතා වැඩිදුරටත් සඳහන් කළේ.
මේ අතර, අනවසර විදුලි වැටවල් හේතුවෙන් 2023 වසරේ මුල් මාස හත තුළ වන අලි ඇතුන් 36 දෙනෙකු මිය ගොස් ඇති බව වනජීවී දෙපාර්තමේන්තුව වාර්තා කර තිබෙනවා.
වන අලි ගම් වැදීම වැළක්වීම සඳහා වනජීවී දෙපාර්තමේන්තුව විද්‍යාත්මක හා තාක්ෂණික පිරිවිතරයන්ට අනුකූලව විදුලි වැටවල් යොදා තිබෙනවා.
කෙසේ වෙතත්, ඇතැම් පුද්ගලයින් තම ගොවිබිම් සහ දේපළ ආරක්ෂා කර ගැනීම සඳහා එවැනි පිරිවිතරයන්ට අනුකූල නොවී විදුලි වැටවල් දැමීම හේතුවෙන් වන අලි කිහිප දෙනෙකු මිය ගොස් ඇති බවයි වනජීවී දෙපාර්තමේන්තුවේ අධ්‍යක්ෂ ජනරාල්වරයා පෙන්වා දෙන්නේ.
ඔහු සඳහන් කළේ වනජීවී දෙපාර්තමේන්තුවෙන් අවශ්‍ය අවසරය ලැබෙන්නේ නම් පමණක් විදුලි වැටවල් දැමිය හැකි බවයි.
එවැනි අවසරයකින් තොරව වැටවල් තනන්නන්ට සහ වන සතුන්ගේ නිදහසේ ගමනා ගමනයට සීමා කිරීමට කටයුතු කරන්නන්ට එරෙහිව නීතිමය පියවර ගන්නා බවද ඔහු අනතුරු අඟවනවා.
