පිළියන්දල අවට ප්රදේශ කිහිපයක මහ මග දමා ගොස් තිබූ අයිතිකරුවෙකු නොමැති යතුරුපදි 3ක් පොලිස් භාරයට ගෙන තිබෙනවා.
එමෙන්ම සොරකම් කළ යතුරු පැදියකින් යමින් සිටි පුද්ගලයෙකු ද පොලිස් අත්අඩංගුවට ගෙන ඇති බවයි අප වාර්තාකරු සඳහන් කළේ.
එම යතුරු පැදි කැස්බෑව ජාලියගොඩ අතුරු මාර්ගයේ, බටකැත්තර මාළු බෝක්කුව අසල සහ බෝකුන්දර මැද්දෝවිට වීරසිංහ මාවතේ දමා ගොස් තිබියදී හමුවූ බව පොලිසිය ප්රකාශ කර තිබෙනවා.
එම යතුරු පැදි සම්බන්ධයෙන් මෝටර් රථ ලියාපදිංචි කිරීමේ දෙපාර්තුමේන්තුව හරහා තොරතුරු ලබාගෙන විමර්ශන සිදුකිරීමට නියමිත බව සඳහන්.
පිළියන්දල පොලිසියේ අපරාධ අංශයේ නිලධාරීන් වැටලීම් රාජකාරි සඳහා යමින් සිටියදී සැකකටයුතු ලෙස පැමිණි යතුරු පැදියකට නතර කරන ලෙසට කළ සංඥා නොතකා පලා යාමට තැත් කිරීමේදී එය පසුපස හඹා ගොස් අත්අඩංගුවට ගෙන තිබෙනවා.
එම සැකකරු පොලිසියට රැගෙන ඒමෙන් අනතුරුව සිදු කළ ප්රශ්න කිරීමේදී හෙළිවී ඇත්තේ අදාළ යතුරුපැදිය මීට සතියකට ඉහතදී අඟුලාන ප්රදේශයෙන් සොරා ගත් එකක් බවටයි.
සැකකරුගෙන් සිදු කළ වැඩිදුර ප්රශ්න කිරීමේදී සොරා ගත් යතුරුපැදියේ ලියාපදිංචි අංකය වෙනස් කර ඇති බවට ද හෙළි කර තිබෙනවා.
තදින් මත්කුඩු පානයට ඇබ්බැහි ව සිටින 29 හැවිරිදි සැකකරු කැස්බෑව මහේස්ත්රාත් අධිකරණයට ඉදිරිපත් කිරීමට නියමිතයි.
