මහින්ද රාජපක්ෂ කැප්පෙටිපොල විරුවාට සම කළ අස්ගිරි අනු නාහිමිගෙන් අනුශාසනාවක් (වීඩියෝ)

මහින්ද රාජපක්ෂ යනු මහා කැප්පෙටිපොල විරුවා හා සමකළ හැකි අසමසම යුග පුරුෂයෙක්, විරුවෙක් බව අස්ගිරි මහා විහාර පාර්ශ්වයේ අනුනායක පුජ්‍ය වේඬරුවේ උපාලි නාහිමියන් පවසනවා.

හිටපු ජනාධිපති මහින්ද රාජපක්ෂගේ 78 වන ජන්ම දිනය වෙනුවෙන් මහනුවර ශ්‍රී දළදා මාලිගාවේ පැවති දානමය පුණ්‍යකර්මයේ අනුශාසනාව සිදුකරමිනුයි උන්වහන්සේ මේ බව කියාසිටියේ.

යුද ජයග්‍රහණයෙන් පසුව පළ වූ පුවත්පත් සිරස්තල කිහිපයක මහින්ද රාජපක්ෂ මහතා ඇගයීමට ලක් කර තිබූ ආකාරය ද අනු නාහිමියන් මෙහිදී උපුටා දැක්වුවා.

මෙහිදී තවදුරටත් අනුශාසනාව සිදුකළ නාහිමියන් මෙලෙස අදහස් පළ කළා,

“එදා කැප්පිටිපොල විරුවා රට ජාතිය වෙනුවෙන් තමන්ගේ ජීවිතය පවා නොතකා දිවිහිමියෙන් කටයුතු කළා. මහින්ද රාජපක්ෂ මහතා එදා වසර තිහක් පැවැති ත්‍රස්තවාදය මුලිනුපුටා දමා රට ජාතිය බේරගන්න ඒ වගේ කැපවීමෙන් කටයුතු කළා. 1948 වසරේ නිදහසින් පසු මේ රටේ ඒකීයභාවය ආරක්ෂා කිරීම වෙනුවෙන් සිදු කළ දැවැන්තම මෙහෙවර යුද්ධය අවසන් කිරීම වශයෙන් අපිට දකින්න පුළුවන්. එදා ගෝඨාභය රාජපක්ෂ මහතා ප්‍රමුඛ රණවිරුවන් ඒ සඳහා මහින්ද රාජපක්ෂ මහතාට දිවි හිමියෙන් සහයෝගය දුන්නා. මේ යුග පුරුෂයා බිහි නොවන්නට අපේ රටේ ඉතිහාසය වෙනස් වන්නට ඉඩ තිබුණා. ඒ නිදහස ලබාදීම අද වෙනකොට බොහෝ දෙනෙකුට අමතක වීම කණගාටුවට කරුණක්. නිදහස් නිවහල් රටක් බිහිකිරීම සඳහා මහින්ද රාජපක්ෂ මහතා සිදුකළ කැපවීම අප කවදත් ගෞරවයෙන් සිහිකළ යුතුයි.”

මෙහිදී මල්වතු මහා විහාර පාර්ශ්වය වෙනුවෙන් අනුශාසනාවක් සිදු කළ එම පාර්ශ්වයේ අනුනායක පුජ්‍ය නියංගොඩ විජිතසිරි නාහිමියන් සඳහන් කළේ රටේ උන්නතිය වෙනුවෙන් විශාල මෙහෙවරක් සිදු කළ මහින්ද රාජපක්ෂ සම්බන්ධයෙන් උද්ගතව පවතින්නෙ ව්‍යාකූල තත්ත්වයක් බවයි.

“අන්තෝ ජටා, බහි ජටා, ජටාය ජටීට පජා, ඇතුළත පටලැවිල්ලක් පිටතත් පටලැවිල්ලක් ජීවීන් පටලැවිල්ලක පැටලී ඇත. යන ධර්ම දේශනාව මෙහිදී අපට උදාහරණයක් වශයෙන් ගන්න පුළුවන්. මහින්ද රාජපක්ෂ මහතා මේ රටට සිදුකළ මෙහෙවර අප සියලු දෙනා කෘතඥපූර්වක සිහි කළ යුතුයි”