අග්‍රාමාත්‍ය මහින්ද රාජපක්ෂ මහතා එම තනතුරින් ඉවත් වී සිය පුතු අමාත්‍ය නාමල් රාජපක්ෂ මහතා වෙත අග්‍රාමාත්‍ය ධූරය භාර දීමට ඇති සූදානමක් පිළිබඳව දේශපාලන පුවත් ආරංචි මාර්ග අනාවරණය කරනවා.
එලෙස අග්‍රාමාත්‍ය ධූරය නාමල් රාජපක්ෂ මහතා වෙත පැවරීම සම්බන්ධයෙන් රාජපක්ෂ පවුල තුළ මාස දෙකක් තිස්සේ සාකච්ඡා පැවැත්වුණු බවයි පැවසෙන්නේ.
ජනාධිපති ගෝඨාභය රාජපක්ෂ, අග්‍රාමාත්‍ය මහින්ද රාජපක්ෂ මෙන්ම හිටපු අමාත්‍ය බැසිල් රාජපක්ෂ ද මෙම සාකච්ඡාවලට එක්ව ඇති බව සඳහන්.
ආණ්ඩුව තුළ නාමල් රාජපක්ෂ මහතාට මීට වඩා වැඩි වගකීමක් ලබා දිය යුතු බවට මෙහි දී සාකච්ඡා වී ඇති බවත්, තවත් අමාත්‍යධූරයක් ඔහුට ලබා දීම පිටුපස පවතින්නේ එම සාකච්ඡාව බවත් වාර්තා වෙනවා.
කෙසේ වෙතත් අග්‍රාමාත්‍යවරයා විසින් ඉදිරියේ දී තවත් වගකීමක් නාමල් රාජපක්ෂ මහතා වෙත පැවරීමට ද සැළසුම් කොට ඇති බව අදාළ පුවත් වාර්තා අනාවරණය කරනවා.
ඒ, ශ්‍රී ලංකා පොදුජන පෙරමුණේ ඉහළතම තනතුරක් ලබා දීම හරහා යි.
මෙම තත්ත්වය අනුව නාමල් රාජපක්ෂ මහතා මේවන විට දරන අමාත්‍ය ධූරවල වගකීම්වලට අමතරව පක්ෂයේ වැඩි වගකීමක් ද පැවරීමට යි මහින්ද රාජපක්ෂ අග්‍රාමාත්‍යවරයා සැළසුම් කොට ඇත්තේ.
කෙසේ වෙතත් මහින්ද රාජපක්ෂ මහතා අග්‍රමාත්‍ය ධූරය අතහැරීම සහ එය නාමල් රාජපක්ෂ මහතා වෙත ලබා දීම කුමන කාලයක දී සිදුවේ දැයි යන්න පිළිබඳව තවමත් නිෂ්චිතව අනාවරණය වන්නේ නැහැ
