ශ්රී ලංකාවේ සම්බුද්ධ ශාසනයේ සුරක්ෂිතතාව සහ උන්නතිය වෙනුවෙන්, සියලු නිකායන් නියෝජනය වන පරිදි පිහිටුවා ඇති “බුද්ධශාසන සභාව” අද (01) දින බුද්ධශාසන අමාත්යාංශයේදී රැස්වුණා.
පූජනීය මහා සංඝරත්නයේ පූර්ණ මැදිහත්වීමෙන් පැවති මෙම හමුවේදී ශාසනික හා ජාතික වැදගත්කමකින් යුත් ප්රධාන කරුණු රැසක් පිළිබඳව අවධානය යොමු කෙරුණා.
බුද්ධශාසන, ආගමික සහ සංස්කෘතික කටයුතු අමාත්ය ආචාර්ය හිනිදුම සුනිල් සෙනෙවිගේ සහ අමාත්යාංශ ලේකම් ප්රින්ස් සේනාධිරගේ මූලිකත්වයෙන් පැවති මෙම හමුවේ දී පසුගිය කාලය තුළ සිදුකළ කටයුතු සමාලෝචනය කිරීම සහ ඉදිරි වැඩකටයුතු පිළිබඳව සාකච්ඡා කිරීම සිදු කෙරුණා.
ජාතික නැකත් කමිටුව විසින් සම්පාදනය කරන ලද 2027 සිංහල අලුත් අවුරුදු නැකත් සීට්ටුව පූජනීය මහා සංඝරත්නය වෙත පිළිගැන්වීම පළමුවෙන්ම සිදු කෙරුණා.
එමෙන්ම, දිට්වා සුළි කුණාටුව හේතුවෙන් ආපදාවට ලක්වූ විහාරස්ථාන ප්රතිසංස්කරණය කිරීම සඳහා ක්රියාත්මක “අධිෂ්ඨානයේ සංහිඳ” ජාතික වැඩසටහනේ ප්රගතිය විමසා බැලීම සහ යතිවර මාපිය නිවහන වැඩසටහනේ ප්රගතිය සමාලෝචනය කිරීම ඇතුළු කරුණු රැසක් පිළිබඳව මෙහිදී සාකච්ඡා වුණා.
විශේෂයෙන්ම, බෞද්ධ කටයුතු දෙපාර්තමේන්තුවේ නිල වෙබ් අඩවිය යාවත්කාලීන කිරීම සහ භික්ෂූන් වහන්සේලා ලියාපදිංචි කිරීම සම්බන්ධයෙන් පැහැදිලි කිරීම් සිදු කෙරුණා.
තවද, දහසක් පුරාවිද්යා ස්ථාන සංරක්ෂණය කිරීම සඳහා ක්රියාත්මක “උරුමයට ජීවයක්” වැඩසටහන පිළිබඳව පැහැදිලි කිරීමක් ද සිදුකෙරිණි. උසස් ප්රමිතියකින් සහ විනයානුකූල ප්රතිපත්තිවලට අනුකූලව අටපිරිකර සැකසීම සම්බන්ධයෙන් අදහස් හා යෝජනා ඉදිරිපත් කිරීම ඇතුළු සුවිශේෂ කරුණු රැසක් ද මෙහිදී සාකච්ඡාවට බඳුන් වුණා.
ගෞරවනීය මහා සංඝරත්නය ඇතුළු සියලුම ආගමික පූජ්ය උතුමන් උදෙසා ක්රියාත්මක “දිවියට සුවයක්, දහමට සවියක්” ජාතික වැඩසටහනේ ප්රගතිය පිළිබඳව ද මෙහිදී කරුණු ඉදිරිපත් කෙරුණා.
එමෙන්ම, මහා සංඝරත්නය මුහුණපාන කාලීන ගැටලු සහ විවිධ අභියෝග පිළිබඳව ගෞරවනීය මහා සංඝරත්නය විසින් කරුණු පෙන්වා දෙනු ලැබුවා.
ඒ සම්බන්ධයෙන් ගත හැකි රාජ්ය මැදිහත්වීම් පිළිබඳව අමාත්යාංශ ලේකම්වරයා සහ අමාත්යවරයා විසින් පැහැදිලි කිරීම් සිදුකරනු ලැබුවා.
