විනාශයට පත් සමාජය යළි සුවපත් කරමින් සදාචාර සම්පන්න රටක් ගොඩනැඟීමේ දී මෙරට මහා සංඝරත්නය ප්රමුඛ ආගමික සංස්ථාවට අත්හළ නොහැකි මහඟු වගකීමක් පැවරී තිබෙන බව ජනාධිපති අනුර කුමාර දිසානායක මහතා පවසනවා.
ආර්ථික සහ දේශපාලන වශයෙන් කොපමණ ජයග්රහණ ලැබුව ද යහපත් සමාජයක් නිර්මාණය කර නොගතහොත් එම කිසිවකින් ඵලක් නොවන බවයි ජනාධිපතිවරයා අවධාරණය කළේ.
මෙරට කඩා වැටී ඇති සමාජ දේහය යළි සුවපත් කිරීම නීතියෙන් පමණක් කළ නොහැකි බවත්, සහකම්පනය සහිත සමාජයක් රට තුළ ගොඩනැඟිය යුතු බවත් පෙන්වා දුන් ජනාධිපතිවරයා පුරවැසියාගේ යහපැවැත්ම වෙනුවෙන් බුදුන් වහන්සේ ඇතුළු සියලු ආගමික ශාස්තෘවරුන් දේශනා කළ විමුක්තියේ හරය පිළිබඳ ප්රබල කතිකාවතක් කඩිනමින් රටට අවශ්ය බව ද ප්රකාශ කළා.
බෞද්ධ කතිකාවත පිළිබඳ පනත සම්බන්ධයෙන් මේ වන විට මහානායක ස්වාමින් වහන්සේලා සමඟ සාකච්ඡා කරමින් පවතින බවත් විහාර දේවාලගම් පනතේ 41 සහ 42 වගන්තිවල සංශෝධන කෙටුම්පත් කර අවසන් බවත් පැවසූ ජනාධිපතිවරයා එය ඉතා ඉක්මනින් කැබිනට් මණ්ඩලයට ඉදිරිපත් කර අනතුරුව පාර්ලිමේන්තුවේ සම්මත කර සංඝ සංස්ථාව විධිමත් කර ගැනීම සඳහා අවශ්ය බලය මහානායක ස්වාමින් වහන්සේ ප්රමුඛ සංඝ සභාව වෙත පැවරීමට කටයුතු කරන බව ද පැවසුවා.
ජනාධිපති අනුර කුමාර දිසානායක මහතා මේ බව පැවසුවේ ශ්රී ලංකා අමරපුර මහා නිකායේ අභිනව උත්තරීතර මහානායක ධුරයෙන් පිදුම් ලද පූජ්ය කරගොඩ උයන්ගොඩ මෛත්රීමූර්ති නාහිමිපාණන් වහන්සේ වෙත ශ්රී සන්නස්පත්ර පිළිගැන්වීමේ රාජ්ය මහෝත්සවයට අද (10) පස්වරුවේ එක්වෙමින්.
